നടൻ ജയം രവിയുമായുള്ള (രവി മോഹൻ) തന്റെ ബന്ധം പൂർണ്ണമായും ഉപേക്ഷിക്കുകയാണെന്ന് ഗായിക കെനീഷ ഫ്രാൻസിസ് പ്രഖ്യാപിച്ചു. സോഷ്യൽ മീഡിയയിൽ പങ്കുവെച്ച വൈകാരികമായ കുറിപ്പിലൂടെയാണ് താരം ഇക്കാര്യം വ്യക്തമാക്കിയത്. തനിക്കെതിരെ ഉയരുന്ന സൈബർ ആക്രമണങ്ങളിലും വ്യക്തിഹത്യകളിലും മനംനൊന്താണ് കെനീഷയുടെ ഈ കടുത്ത തീരുമാനം.
താൻ സ്നേഹത്തോടെയാണ് ഈ ബന്ധത്തിലേക്ക് കടന്നുവന്നതെന്നും എന്നാൽ ഇപ്പോൾ നിശബ്ദതയോടെ പിന്മാറുകയാണെന്നും കെനീഷ കുറിച്ചു. അനാവശ്യമായ ആരോപണങ്ങളും കൃത്രിമമായ കഥകളും കാരണം നന്മയ്ക്ക് അവിടെ ശ്വസിക്കാൻ ഇടമില്ലാതായെന്ന് അവർ ആരോപിക്കുന്നു. ജയം രവിയെ സ്നേഹിക്കുന്നവർക്കും വിമർശിക്കുന്നവർക്കും അദ്ദേഹത്തിന്റെ ജീവിതത്തിൽ അവകാശവാദം ഉന്നയിക്കുന്നവർക്കുമായി അദ്ദേഹത്തെ വിട്ടുനൽകുകയാണെന്നും താരം വ്യക്തമാക്കി.
ഇനി യാതൊരുവിധ വിശദീകരണങ്ങൾക്കും താൻ തയ്യാറല്ലെന്നും, പ്രതിരോധിക്കാനോ യുദ്ധം ചെയ്യാനോ താനില്ലെന്നും കെനീഷ കൂട്ടിച്ചേർത്തു. താൻ ചെന്നൈ വിടുകയാണെന്നും, തന്റെ സംഗീതവും തെറാപ്പിയും ഉൾപ്പെടെയുള്ള എല്ലാ ഉത്തരവാദിത്തങ്ങളിൽ നിന്നും പിന്മാറുകയാണെന്നും അവർ അറിയിച്ചു. സത്യത്തെക്കാൾ വികാരങ്ങൾക്ക് പ്രാധാന്യം നൽകുന്ന ഈ ലോകത്ത് മൃദുത്വത്തിന് സ്ഥാനമില്ലെന്ന് തിരിച്ചറിഞ്ഞാണ് ഈ തീരുമാനമെന്നും കെനീഷ വ്യക്തമാക്കി.
തന്റെ ജീവിതത്തെക്കുറിച്ച് ആശങ്കപ്പെടുത്തിയ എല്ലാ കാര്യങ്ങളും ഉപേക്ഷിക്കുകയാണെന്നും, സമാധാനത്തോടെയും സ്നേഹത്തോടെയും പൂർണ്ണമായ അകൽച്ചയോടെയാണ് താൻ ഈ പിന്മാറ്റം നടത്തുന്നതെന്നും കെനീഷ തന്റെ കുറിപ്പിൽ വ്യക്തമാക്കിയിട്ടുണ്ട്. ഇതോടെ ജയം രവിയുമായുള്ള വിവാദങ്ങൾക്ക് താൻ പൂർണ്ണവിരാമം ഇടുകയാണെന്ന സൂചനയാണ് ഗായിക നൽകുന്നത്.
Photo and News Source: Kerala Kaumudi Latest
