ധൂർത്തില്ലാത്ത ഭരണരീതി ഉറപ്പാക്കാൻ ലക്ഷ്യമിട്ട് നിയുക്ത മുഖ്യമന്ത്രി വി ഡി സതീശൻ. ഇതിന്റെ ഭാഗമായി മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിലും മന്ത്രി മന്ദിരങ്ങളിലും വൻ തുക ചെലവഴിച്ചുള്ള മോടിപിടിപ്പിക്കൽ പ്രവർത്തനങ്ങൾ ഒഴിവാക്കാൻ അദ്ദേഹം പൊതുഭരണ വകുപ്പിന് നിർദ്ദേശം നൽകി. അത്യാവശ്യമായ ചെറിയ അറ്റകുറ്റപ്പണികൾ മാത്രം മതിയെന്നാണ് അദ്ദേഹത്തിന്റെ നിലപാട്.
കഴിഞ്ഞ പിണറായി വിജയൻ സർക്കാരിന്റെ കാലത്ത് ക്ലിഫ് ഹൗസിലെ നവീകരണ പ്രവർത്തനങ്ങൾ വലിയ വിവാദങ്ങൾക്ക് വഴിവെച്ചിരുന്നു. സാമ്പത്തിക പ്രതിസന്ധികൾക്കിടയിലും നീന്തൽക്കുളം നവീകരണത്തിനും ലിഫ്റ്റ് നിർമ്മാണത്തിനുമായി ലക്ഷക്കണക്കിന് രൂപ ചെലവഴിച്ചത് വലിയ വിമർശനങ്ങൾ ഉയർത്തിയിരുന്നു. 2016 മുതൽ 2022 വരെയുള്ള കാലയളവിൽ നീന്തൽക്കുളത്തിനായി മാത്രം 31 ലക്ഷത്തിലധികം രൂപയാണ് ചെലവായത്.
ഏകദേശം 4.2 ഏക്കർ വിസ്തൃതിയുള്ള ക്ലിഫ് ഹൗസ് കോംപൗണ്ടിൽ ഏഴ് കിടപ്പുമുറികളും കോൺഫറൻസ് ഹാളും ഉൾപ്പെടെ വിപുലമായ സൗകര്യങ്ങളാണുള്ളത്. മുൻ സർക്കാരിന്റെ കാലത്ത് മരപ്പട്ടി ശല്യം ഉൾപ്പെടെയുള്ള വിഷയങ്ങൾ വാർത്തകളിൽ ഇടംപിടിച്ചിരുന്നു. ഇത്തരം അനാവശ്യ ചെലവുകൾ ഒഴിവാക്കി മാതൃകാപരമായ ഭരണത്തിന് തുടക്കം കുറിക്കാനാണ് വി ഡി സതീശൻ ശ്രമിക്കുന്നത്.
Photo and News Source: Asianet News
