സംസ്ഥാനം കടുത്ത സാമ്പത്തിക പ്രതിസന്ധിയിലൂടെ കടന്നുപോകുമ്പോൾ, മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിലും മറ്റ് മന്ത്രി മന്ദിരങ്ങളിലും അനാവശ്യമായ ആഡംബര മോടിപിടിപ്പിക്കലുകൾ ഒഴിവാക്കണമെന്ന് പ്രതിപക്ഷ നേതാവ് വി.ഡി. സതീശൻ നിർദ്ദേശിച്ചു. അകമ്പടി വാഹനങ്ങളുടെ എണ്ണം കുറയ്ക്കാനുള്ള തീരുമാനത്തിന് പിന്നാലെയാണ് ഈ നിർദ്ദേശവും വന്നിരിക്കുന്നത്. വൻ തുക ചെലവഴിച്ചുള്ള നവീകരണ പ്രവർത്തനങ്ങൾ വേണ്ടെന്നും, അനിവാര്യമായ ചെറിയ അറ്റകുറ്റപ്പണികൾ മാത്രം മതിയെന്നുമാണ് പൊതുഭരണ വകുപ്പിന് നൽകിയിരിക്കുന്ന നിർദ്ദേശം.
പിണറായി വിജയൻ സർക്കാരിന്റെ കാലത്ത് ക്ലിഫ് ഹൗസ് നവീകരണവുമായി ബന്ധപ്പെട്ട് വലിയ വിവാദങ്ങൾ ഉയർന്നിരുന്നു. സാമ്പത്തിക പ്രതിസന്ധികൾക്കിടയിലും ക്ലിഫ് ഹൗസിലെ നീന്തൽക്കുളം മോടിപിടിപ്പിക്കാനായി 31,92,360 രൂപയാണ് ചെലവാക്കിയത്. കൂടാതെ, 25.50 ലക്ഷം രൂപ മുടക്കി ലിഫ്റ്റ് നിർമ്മിച്ചതും വലിയ ചർച്ചയായിരുന്നു. ഇത്തരം ചെലവുകൾക്കെതിരെ അന്ന് വലിയ വിമർശനങ്ങളാണ് ഉയർന്നുവന്നത്.
ക്ലിഫ് ഹൗസിലെ മരപ്പട്ടി ശല്യത്തെക്കുറിച്ച് മുഖ്യമന്ത്രി നടത്തിയ പരസ്യ പ്രതികരണം നേരത്തെ വാർത്തകളിൽ ഇടംപിടിച്ചിരുന്നു. 4.2 ഏക്കറിലായി വ്യാപിച്ചുകിടക്കുന്ന ക്ലിഫ് ഹൗസ് കോമ്പൗണ്ടിൽ ഏഴ് കിടപ്പുമുറികൾ, ഓഫീസ് മുറി, കോൺഫറൻസ് ഹാൾ എന്നിവയുണ്ട്. ഇതിനുപുറമെ സുരക്ഷാ ഉദ്യോഗസ്ഥർക്കും ജീവനക്കാർക്കുമായി രണ്ട് ചെറിയ കെട്ടിടങ്ങളും ഇവിടെ പ്രവർത്തിക്കുന്നുണ്ട്. 15,000 ചതുരശ്ര അടി വിസ്തീർണ്ണമുള്ള ഈ വസതിയുടെ പരിപാലനത്തിന് വൻ തുക ചെലവാകുന്നത് പൊതുജനശ്രദ്ധയിൽ വന്നിരുന്നു.
Photo and News Source: Sathyam Online
