മന്ത്രിമാരെ നിശ്ചയിക്കുന്നതിനുള്ള പൂർണ്ണ അധികാരം സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങൾക്ക് നൽകാൻ മുസ്ലിംലീഗ് നേതൃയോഗം തീരുമാനിച്ചു. ബുധനാഴ്ച പാണക്കാട് തങ്ങളുടെ വസതിയിൽ ചേർന്ന ഉന്നതതല യോഗത്തിലാണ് ഇതുസംബന്ധിച്ച നിർണ്ണായക തീരുമാനം കൈക്കൊണ്ടത്. മന്ത്രിസഭ രൂപവത്കരണ നടപടികൾ ഔദ്യോഗികമായി ആരംഭിച്ചാലുടൻ തന്നെ ലീഗ് മന്ത്രിമാരുടെ പേരുകൾ സാദിഖലി തങ്ങൾ പ്രഖ്യാപിക്കും. ഇതോടൊപ്പം പാർലമെന്ററി പാർട്ടി ഭാരവാഹികളെയും യോഗത്തിൽ തീരുമാനിക്കും.
യു.ഡി.എഫ് ഉഭയകക്ഷി ചർച്ചകളിൽ പങ്കെടുക്കേണ്ട പ്രതിനിധി സംഘത്തെയും യോഗം നിശ്ചയിച്ചു. പി.കെ. കുഞ്ഞാലിക്കുട്ടി നേതൃത്വം നൽകുന്ന സംഘമായിരിക്കും ചർച്ചകളിൽ പങ്കെടുക്കുക. ലീഗിന് ലഭിക്കേണ്ട വകുപ്പുകൾ, മന്ത്രിമാരുടെ എണ്ണം എന്നിവ സംബന്ധിച്ചും യോഗത്തിൽ പ്രാഥമിക ചർച്ചകൾ നടന്നു. മുഖ്യമന്ത്രിയെ തീരുമാനിക്കുന്നതിലെ കാലതാമസത്തിൽ യോഗത്തിൽ പങ്കെടുത്ത നേതാക്കൾ കടുത്ത അതൃപ്തി രേഖപ്പെടുത്തി.
യു.ഡി.എഫിന്റെ തെരഞ്ഞെടുപ്പ് വിജയത്തിന്റെ തിളക്കം കുറയ്ക്കുന്ന രീതിയിലാണ് ചർച്ചകൾ നീണ്ടുപോകുന്നതെന്ന് നേതാക്കൾ അഭിപ്രായപ്പെട്ടു. ജനവികാരം മാനിക്കാതെ കാര്യങ്ങൾ നീങ്ങുന്നത് ശരിയല്ലെന്നും അവർ ചൂണ്ടിക്കാട്ടി. ഡൽഹിയിൽ നിന്ന് മുഖ്യമന്ത്രിയെ സംബന്ധിച്ച അന്തിമ തീരുമാനം വന്ന ശേഷം കൂടുതൽ പ്രതികരിക്കാമെന്ന് യോഗത്തിന് ശേഷം പി.കെ. കുഞ്ഞാലിക്കുട്ടി മാധ്യമങ്ങളോട് വ്യക്തമാക്കി.
ദേശീയ ജനറൽ സെക്രട്ടറി പി.കെ. കുഞ്ഞാലിക്കുട്ടി, എം.പിമാരായ ഇ.ടി. മുഹമ്മദ് ബഷീർ, പി.വി. അബ്ദുൽവഹാബ്, അബ്ദുൽസമദ് സമദാനി, സംസ്ഥാന ജനറൽ സെക്രട്ടറി പി.എം.എ. സലാം, എം.കെ. മുനീർ, കെ.പി.എ. മജീദ് തുടങ്ങിയ പ്രമുഖ നേതാക്കൾ യോഗത്തിൽ പങ്കെടുത്തു.
Photo and News Source: Sathyam Online
