സംസ്ഥാന സർക്കാരിന്റെ പുതിയ മദ്യ ബ്രാൻഡായ 'മിന്നൽ മാജിക്' ഈ മാസം അവസാനത്തോടെ വിപണിയിലെത്തും. ബിവറേജസ് കോർപ്പറേഷൻ ഔട്ട്ലെറ്റുകൾ വഴി ലഭ്യമാകുന്ന ഈ ബ്രാൻഡിക്ക് അര ലിറ്റർ കുപ്പിക്ക് 400 രൂപയാണ് വില നിശ്ചയിച്ചിരിക്കുന്നത്. നിലവിൽ സർക്കാരിന്റെ ജനപ്രിയ ഉത്പന്നമായ ജവാൻ റമ്മിന് പുറമെയാണ് മിന്നൽ മാജിക്കും ഉപഭോക്താക്കളിലേക്ക് എത്തുന്നത്.
പാലക്കാട് ജില്ലയിലെ ചിറ്റൂർ മേനോൻപാറയിൽ സ്ഥിതി ചെയ്യുന്ന സർക്കാർ ഉടമസ്ഥതയിലുള്ള മലബാർ ഡിസ്റ്റിലറീസിലാണ് ഈ മദ്യം ഉത്പാദിപ്പിക്കുന്നത്. ഫെബ്രുവരി 21-ന് ഉദ്ഘാടനം ചെയ്ത ഈ പ്ലാന്റ് വെറും നാലര മാസം കൊണ്ടാണ് നിർമ്മാണം പൂർത്തിയാക്കിയത്. മിനിറ്റിൽ 240 കുപ്പികൾ വരെ നിറയ്ക്കാൻ ശേഷിയുള്ള അത്യാധുനിക സംവിധാനമാണ് ഇവിടെ ഒരുക്കിയിരിക്കുന്നത്.
തുടക്കത്തിൽ പ്രതിദിനം 9,000 കെയ്സ് മദ്യമാണ് ഉത്പാദിപ്പിക്കാൻ ലക്ഷ്യമിടുന്നത്. പിന്നീട് ഇത് 13,000 കെയ്സായി വർദ്ധിപ്പിക്കും. മദ്യ ഉത്പാദനത്തിനായി പ്രതിദിനം ഒരു ലക്ഷം ലിറ്റർ വെള്ളം ആവശ്യമാണ്. നിലവിൽ ജല അതോറിറ്റിയുമായി സഹകരിച്ച് മലമ്പുഴയിലെ പ്ലാന്റിൽ നിന്നാണ് വെള്ളം എത്തിക്കുന്നത്. ഭാവിയിൽ മഴവെള്ള സംഭരണി സ്ഥാപിച്ച് ജലലഭ്യത ഉറപ്പാക്കാനും സർക്കാർ പദ്ധതിയിടുന്നുണ്ട്.
Photo and News Source: Kerala Kaumudi Latest
