സംസ്ഥാനത്ത് മുഖ്യമന്ത്രിയെ തിരഞ്ഞെടുക്കുന്നതുമായി ബന്ധപ്പെട്ട് തുടരുന്ന അനിശ്ചിതത്വങ്ങൾക്കിടയിൽ, കേരളത്തിൽ രാഷ്ട്രപതി ഭരണം ഏർപ്പെടുത്തണമെന്ന് ആവശ്യപ്പെട്ട് നടൻ സന്തോഷ് പണ്ഡിറ്റ് രംഗത്ത്. വോട്ടെണ്ണൽ കഴിഞ്ഞ് ദിവസങ്ങൾ പിന്നിട്ടിട്ടും തീരുമാനമുണ്ടാകാത്ത സാഹചര്യത്തിൽ, മെയ് 24 മുതൽ സംസ്ഥാനത്ത് രാഷ്ട്രപതി ഭരണം വരാൻ സാധ്യതയുണ്ടെന്ന് അദ്ദേഹം അഭിപ്രായപ്പെട്ടു. കേരളം കേന്ദ്രഭരണ പ്രദേശമായാൽ ലഫ്റ്റനന്റ് ഗവർണറായി ചുമതലയേൽക്കാൻ താൻ തയ്യാറാണെന്നും അദ്ദേഹം വ്യക്തമാക്കി.
ലഫ്റ്റനന്റ് ഗവർണറായി ചുമതലയേറ്റാൽ നടപ്പിലാക്കാൻ ഉദ്ദേശിക്കുന്ന 37 നിർദ്ദേശങ്ങളും അദ്ദേഹം പങ്കുവെച്ചിട്ടുണ്ട്. ഇതിൽ മദ്യനിരോധനം, വിദ്യാഭ്യാസ സ്ഥാപനങ്ങളിലെ രാഷ്ട്രീയം അവസാനിപ്പിക്കൽ, സർക്കാർ ഉദ്യോഗസ്ഥരുടെ ശമ്പള പരിധി നിജപ്പെടുത്തൽ എന്നിവ ഉൾപ്പെടുന്നു. ജയിലുകളിൽ നോൺ-വെജിറ്റേറിയൻ ഭക്ഷണം ഒഴിവാക്കി വെജിറ്റേറിയൻ ഭക്ഷണം മാത്രം നൽകുമെന്നും, തടവുകാരുടെ ഭക്ഷണച്ചെലവ് അവരുടെ കുടുംബങ്ങൾ വഹിക്കണമെന്നും അദ്ദേഹം നിർദ്ദേശിക്കുന്നു.
ബിസിനസ്സ് സംരംഭങ്ങൾക്കായി നിലവിലുള്ള നൂലാമാലകൾ ഒഴിവാക്കി കേരളത്തെ ബിസിനസ്സ് സൗഹൃദമാക്കുമെന്നും, മലപ്പുറം ജില്ല വിഭജിച്ച് തിരൂർ, മഞ്ചേരി എന്നീ പുതിയ ജില്ലകൾ രൂപീകരിക്കുമെന്നും അദ്ദേഹം പറഞ്ഞു. തെരുവ് നായ ശല്യം പരിഹരിക്കാൻ പ്രത്യേക ഷെൽട്ടറുകൾ നിർമ്മിക്കുമെന്നും, ഭിക്ഷാടനം നിരോധിക്കുമെന്നും അദ്ദേഹം കൂട്ടിച്ചേർത്തു. ചാരിറ്റി പ്രവർത്തനങ്ങളുടെ പേരിൽ നടക്കുന്ന തട്ടിപ്പുകൾ തടയാൻ കർശനമായ നിയമങ്ങൾ കൊണ്ടുവരുമെന്നും, പൊതുഗതാഗത സംവിധാനങ്ങളിലും കെട്ടിടങ്ങളിലും സിസിടിവി നിർബന്ധമാക്കുമെന്നും അദ്ദേഹം വ്യക്തമാക്കി.
കേരളത്തിലെ സാധാരണക്കാർക്ക് വിമാനം, കപ്പൽ, ട്രെയിൻ യാത്രകൾക്കുള്ള സൗകര്യങ്ങൾ ഒരുക്കി എല്ലാവരെയും സന്തോഷിപ്പിക്കുക എന്നതാണ് തന്റെ ലക്ഷ്യമെന്നും സന്തോഷ് പണ്ഡിറ്റ് അവകാശപ്പെടുന്നു. തന്റെ ബയോഡേറ്റയും ഈ നിർദ്ദേശങ്ങളും അദ്ദേഹം ഇതിനകം തയ്യാറാക്കി വെച്ചിട്ടുണ്ട്.
Photo and News Source: Asianet News
