ജിദ്ദയിൽ ചേർന്ന സൗദി മന്ത്രിസഭാ യോഗം ഗൾഫ് രാജ്യങ്ങളുടെ സമുദ്രാതിർത്തികൾ ലക്ഷ്യമിട്ടുള്ള ആക്രമണങ്ങളെ ശക്തമായി അപലപിച്ചു. യുണൈറ്റഡ് അറബ് എമിറേറ്റ്സ് (യുഎഇ), ഖത്തർ, കുവൈറ്റ് എന്നീ രാജ്യങ്ങളുടെ സമുദ്രാതിർത്തികളിൽ നടന്ന 'വഞ്ചനാപരമായ' ആക്രമണങ്ങളെയാണ് സൗദി അറേബ്യ വിമർശിച്ചത്. സൗദി കിരീടാവകാശി മുഹമ്മദ് ബിൻ സൽമാൻ രാജകുമാരന്റെ അധ്യക്ഷതയിലാണ് ഈ നിർണ്ണായക യോഗം ചേർന്നത്.
ഗൾഫ് രാജ്യങ്ങളുടെ സുരക്ഷയും സ്ഥിരതയും സംരക്ഷിക്കുന്നതിനായി സ്വീകരിക്കുന്ന എല്ലാ നടപടികൾക്കും സൗദി അറേബ്യയുടെ പൂർണ്ണ പിന്തുണയുണ്ടാകുമെന്ന് മന്ത്രിസഭ വ്യക്തമാക്കി. സൗദി പ്രസ് ഏജൻസി പുറത്തിറക്കിയ ഔദ്യോഗിക പ്രസ്താവനയിലൂടെയാണ് ഇക്കാര്യം അറിയിച്ചത്. മേഖലയിലെ സമാധാനാന്തരീക്ഷം തകർക്കാൻ ശ്രമിക്കുന്ന ഇത്തരം പ്രവൃത്തികൾക്കെതിരെ ശക്തമായ നിലപാടാണ് സൗദി സ്വീകരിച്ചിരിക്കുന്നത്.
ഇതോടൊപ്പം, രാജ്യത്തിന്റെ ആഭ്യന്തര വിഷയങ്ങളും മന്ത്രിസഭ അവലോകനം ചെയ്തു. പ്രാദേശിക വികസനങ്ങൾ, അന്താരാഷ്ട്ര സഹകരണ ശ്രമങ്ങൾ, വ്യാവസായിക-ഖനന മേഖലകളിലെ പുരോഗതി എന്നിവ യോഗത്തിൽ ചർച്ചയായി. ആരോഗ്യം, വിദ്യാഭ്യാസം, അടിസ്ഥാന സൗകര്യങ്ങൾ തുടങ്ങിയ മുൻഗണനാ മേഖലകളിൽ സർക്കാർ നടത്തിവരുന്ന തുടർച്ചയായ നിക്ഷേപങ്ങളെയും സാമ്പത്തിക സൂചകങ്ങളെയും കുറിച്ച് മന്ത്രിമാർ വിശദമായി വിലയിരുത്തി.
Photo and News Source: Mathrubhumi
