ടി20 ലോകകപ്പിന് തൊട്ടുമുമ്പ് ഇന്ത്യൻ ടീമിലെ തന്റെ സ്ഥാനം നഷ്ടപ്പെട്ടതിനെക്കുറിച്ചും, ആ പ്രതിസന്ധി ഘട്ടത്തെ എങ്ങനെ അതിജീവിച്ചു എന്നതിനെക്കുറിച്ചും മലയാളി താരം സഞ്ജു സാംസൺ ആദ്യമായി മനസ്സ് തുറന്നു. ചെന്നൈ സൂപ്പർ കിംഗ്സിന്റെ ഔദ്യോഗിക പോഡ്കാസ്റ്റിൽ അഭിനവ് മുകുന്ദിനോട് സംസാരിക്കവെയാണ് സഞ്ജു തന്റെ കരിയറിലെ വൈകാരികമായ ആ നിമിഷങ്ങളെക്കുറിച്ച് വ്യക്തമാക്കിയത്.
ലോകകപ്പിന് തൊട്ടുമുമ്പുള്ള മാസങ്ങളിൽ ഫോം കണ്ടെത്താൻ താൻ ബുദ്ധിമുട്ടിയിരുന്നെന്നും, ആ സമയത്ത് ടീമിൽ ഇടം അർഹിച്ചത് ഇഷാൻ കിഷൻ തന്നെയായിരുന്നുവെന്നും സഞ്ജു തുറന്നുസമ്മതിച്ചു. ആഭ്യന്തര ക്രിക്കറ്റിലെ മികച്ച പ്രകടനത്തിലൂടെ ഇഷാൻ ടീമിലേക്ക് കടന്നുവരികയായിരുന്നു. മുഷ്താഖ് അലി ട്രോഫിയിൽ ടീമിനെ ചാമ്പ്യന്മാരാക്കിയ ഇഷാൻ, കഠിനാധ്വാനത്തിലൂടെയാണ് തന്റെ തിരിച്ചുവരവ് സാധ്യമാക്കിയത്. തന്റെ സ്ഥാനം അവൻ ലക്ഷ്യം വെക്കുന്നുണ്ടെന്ന് അന്ന് തന്നെ തനിക്ക് തോന്നിയിരുന്നുവെന്നും സഞ്ജു പറഞ്ഞു.
ന്യൂസിലൻഡിനെതിരെ തിരുവനന്തപുരത്ത് നടന്ന മത്സരത്തിൽ ഇഷാൻ നേടിയ സെഞ്ച്വറി തന്റെ ലോകകപ്പ് സാധ്യതകളെ ഇല്ലാതാക്കിയെന്ന് സഞ്ജു ഓർക്കുന്നു. ആ നിമിഷം താൻ സ്വയം പറഞ്ഞത് ഇങ്ങനെയായിരുന്നു: 'സഞ്ജു, നീ ഇത് അവന് വിട്ടുകൊടുക്കൂ. അവൻ ഇത് നിന്നേക്കാൾ അർഹിക്കുന്നു. നിനക്ക് അവസരങ്ങൾ ലഭിച്ചെങ്കിലും അത് മുതലാക്കാൻ സാധിച്ചില്ല, എന്നാൽ ഫോമിന്റെ കൊടുമുടിയിലുള്ള ഒരാൾ മുന്നിലുണ്ട്.'
ലോകകപ്പിന്റെ ആദ്യ പകുതിയിൽ ബെഞ്ചിലിരിക്കേണ്ടി വന്നെങ്കിലും, പിന്നീട് ടീമിലെത്തിയ സഞ്ജു തന്റെ മികവ് തെളിയിച്ചു. ടൂർണമെന്റിലെ 5 ഇന്നിംഗ്സുകളിൽ നിന്ന് 320-ലധികം റൺസ് അടിച്ചുകൂട്ടിയ സഞ്ജു, നിർണായക മത്സരങ്ങളിൽ ടീമിന്റെ ടോപ് സ്കോററായി മാറി. ഇന്ത്യ ലോകകിരീടം നേടിയപ്പോൾ ടൂർണമെന്റിലെ മികച്ച താരമായും സഞ്ജു തിരഞ്ഞെടുക്കപ്പെട്ടു.
Photo and News Source: Asianet News
