ഒരിക്കൽ കുറ്റകൃത്യങ്ങളിൽ ഏർപ്പെട്ടതിന്റെ പേരിൽ സമൂഹത്തിൽ നിന്ന് മാറ്റിനിർത്തപ്പെടുന്നവർക്ക് പുതിയൊരു ജീവിതം സമ്മാനിക്കുകയാണ് മലേഷ്യയിലെ ഒരു ഫുഡ്കോർട്ട് ഉടമയായ ഓങ് ചീ സിയാങ്. മലേഷ്യയുടെ 'ലൈസൻസ്ഡ് റിലീസ് ഓഫ് പ്രിസണേഴ്സ്' പ്രോഗ്രാമിന്റെ ഭാഗമായി പരോളിലിറങ്ങുന്ന തടവുകാർക്ക് തന്റെ സ്ഥാപനത്തിൽ മാന്യമായ തൊഴിൽ അവസരം നൽകിയാണ് അദ്ദേഹം മാതൃകയാകുന്നത്. ജയിൽ ശിക്ഷാ കാലാവധി പൂർത്തിയാക്കുന്നതിന് മുൻപ് തന്നെ ഇവർക്ക് സമൂഹത്തിന്റെ മുഖ്യധാരയിലേക്ക് മടങ്ങിവരാൻ ഈ സംരംഭം സഹായിക്കുന്നു.
ഫുഡ്കോർട്ടിലെ ഓർഡർ എടുക്കുന്നത് മുതൽ കോഫി തയ്യാറാക്കുന്നതും മേശകൾ വൃത്തിയാക്കുന്നതും വരെയുള്ള ജോലികൾ ചെയ്യുന്നത് പരോളിലിറങ്ങിയവരാണ്. കർശനമായ നിബന്ധനകൾക്ക് വിധേയമായാണ് ഇവർക്ക് പുറത്തിറങ്ങാൻ അനുവാദം ലഭിക്കുന്നത്. ജോലിസ്ഥലത്തും അധികൃതരുടെ കൃത്യമായ നിരീക്ഷണം ഇവർക്കുണ്ടാകും. കൂടാതെ, ദിവസവും മൊബൈൽ ഫോൺ വഴി ചെക്ക് ഇൻ ചെയ്യുക, ജോലിക്ക് ശേഷം നിശ്ചിത താമസസ്ഥലത്ത് കഴിയുക, നിയമവിരുദ്ധ പ്രവർത്തനങ്ങളിൽ നിന്ന് വിട്ടുനിൽക്കുക തുടങ്ങിയ കർശന വ്യവസ്ഥകളും ഇവർ പാലിക്കേണ്ടതുണ്ട്.
തന്റെ സ്ഥാപനത്തിലെ ജീവനക്കാരുടെ കുറവ് പരിഹരിക്കാനാണ് ഇത്തരമൊരു ആശയം നടപ്പിലാക്കിയതെന്ന് ഓങ് ചീ സിയാങ് പറയുന്നു. തുടക്കത്തിൽ ഉപഭോക്താക്കളുടെ പ്രതികരണത്തെക്കുറിച്ച് ആശങ്കയുണ്ടായിരുന്നെങ്കിലും, പരോളിലിറങ്ങിയ തൊഴിലാളികളുടെ കഠിനാധ്വാനവും ആത്മാർത്ഥതയും കണ്ട് ഉപഭോക്താക്കൾ തന്നെ ഇവരെ പ്രശംസിക്കാൻ തുടങ്ങി. "അവരുടെ ഭൂതകാലത്തിന്റെ പേരിൽ നമ്മൾ അവരെ പൂർണമായും എഴുതിത്തള്ളരുത്," എന്നാണ് അദ്ദേഹം അഭിപ്രായപ്പെടുന്നത്. നിലവിൽ ആറ് പേരാണ് ഇവിടെ ജോലി ചെയ്യുന്നത്. ഇവർക്ക് മാന്യമായ ശമ്പളത്തിന് പുറമെ ഭക്ഷണവും താമസസൗകര്യവും ഉടമ ഉറപ്പുവരുത്തുന്നുണ്ട്.
Photo and News Source: Kerala Kaumudi Latest
