ഇന്നത്തെ തിരക്കേറിയ ജീവിതശൈലിയിൽ പലരും ഒഴിവാക്കുന്ന ഒന്നാണ് പ്രഭാതഭക്ഷണം. സമയക്കുറവ് കാരണം പലരും രാവിലെ ഭക്ഷണം കഴിക്കാറില്ല, എന്നാൽ ഇത് ആരോഗ്യത്തെ ദോഷകരമായി ബാധിക്കും. ഈ പ്രശ്നത്തിന് പരിഹാരമായി വെറും 15 മിനിറ്റിനുള്ളിൽ തയ്യാറാക്കാവുന്ന പോഷകസമൃദ്ധമായ ഒരു വിഭവമാണ് ഓട്സ് ഉപ്പുമാവ്. ആരോഗ്യകരമായ ഭക്ഷണശീലം പിന്തുടരാൻ ആഗ്രഹിക്കുന്നവർക്ക് ഇത് മികച്ചൊരു തിരഞ്ഞെടുപ്പാണ്.
ആദ്യം ഒരു പാനിൽ ഓട്സ് എടുത്ത് അഞ്ച് മിനിറ്റ് നന്നായി റോസ്റ്റ് ചെയ്ത് തണുക്കാനായി മാറ്റിവെക്കുക. ശേഷം അതേ പാനിൽ അല്പം എണ്ണ ഒഴിച്ച് കടുക്, ഉഴുന്ന് തുടങ്ങിയ താളിക്കാനുള്ള ചേരുവകൾ ചേർത്ത് ഗോൾഡൻ നിറമാകുന്നതുവരെ വഴറ്റുക. ഇതിലേക്ക് ഇഞ്ചി, പച്ചമുളക്, കായം, കറിവേപ്പില എന്നിവ ചേർത്ത് നന്നായി ഇളക്കുക. തുടർന്ന് സവാള ചേർത്ത് വഴറ്റിയ ശേഷം ക്യാരറ്റ്, ഗ്രീൻപീസ്, ബീൻസ് തുടങ്ങിയ പച്ചക്കറികൾ ആവശ്യാനുസരണം ചേർത്ത് വേവിക്കുക.
പച്ചക്കറികൾ പാകമാകുമ്പോൾ മഞ്ഞൾപ്പൊടി ചേർത്ത് ഇളക്കുക. നേരത്തെ വറുത്തുവെച്ച ഓട്സ് കഴുകി ഇതിലേക്ക് ചേർക്കുക. ആവശ്യത്തിന് ഉപ്പും ചേർത്ത് നന്നായി യോജിപ്പിച്ച ശേഷം ഏഴ് മിനിറ്റ് അടച്ചുവെച്ച് വേവിക്കുക. അവസാനമായി അടുപ്പിൽ നിന്ന് മാറ്റിയ ശേഷം ചിരകിയ തേങ്ങ വിതറി സ്വാദിഷ്ടമായ ഓട്സ് ഉപ്പുമാവ് വിളമ്പാവുന്നതാണ്. വളരെ എളുപ്പത്തിൽ തയ്യാറാക്കാവുന്ന ഈ വിഭവം ആരോഗ്യത്തിനും ഉന്മേഷത്തിനും ഏറെ ഗുണകരമാണ്.
Photo and News Source: Sathyam Online
