മലയാള സിനിമയിലെ എക്കാലത്തെയും വലിയ താരബ്രാൻഡായ മോഹൻലാലും സംവിധായകൻ ജീത്തു ജോസഫും വീണ്ടും ഒന്നിക്കുന്ന 'ദൃശ്യം 3' റിലീസിനായി കാത്തിരിക്കുകയാണ് സിനിമാലോകം. മലയാള സിനിമയിൽ ആദ്യമായി 50 കോടി ക്ലബ്ബിൽ ഇടംപിടിച്ച ചിത്രമായിരുന്നു 'ദൃശ്യം'. ഇപ്പോൾ ഈ പരമ്പരയിലെ മൂന്നാം ഭാഗം എത്തുമ്പോൾ ബോക്സ് ഓഫീസിൽ വലിയ അത്ഭുതങ്ങൾ സംഭവിക്കുമെന്ന പ്രതീക്ഷയിലാണ് ആരാധകർ.
മോഹൻലാലിന്റെ ജന്മദിനമായ മെയ് 21-നാണ് ചിത്രം തിയേറ്ററുകളിൽ എത്തുന്നത്. റിലീസിന് ദിവസങ്ങൾ മാത്രം ബാക്കിനിൽക്കെ, അഡ്വാൻസ് ബുക്കിംഗിലൂടെ തന്നെ ചിത്രം ആഗോളതലത്തിൽ 7 കോടിയോളം രൂപ ഇതിനകം നേടിക്കഴിഞ്ഞു. പല കേന്ദ്രങ്ങളിലും ബുക്കിംഗ് ആരംഭിച്ചിട്ടില്ലെന്നിരിക്കെ, ഈ കണക്കുകൾ വലിയൊരു മുന്നേറ്റത്തിന്റെ സൂചനയാണ് നൽകുന്നത്.
സിനിമയുടെ ആദ്യ ദിന കളക്ഷൻ 50 കോടി രൂപ കടക്കുമെന്നാണ് ട്രേഡ് അനലിസ്റ്റുകളുടെ വിലയിരുത്തൽ. 2013-ൽ പുറത്തിറങ്ങിയ ആദ്യ ഭാഗം ആകെ 62 കോടി രൂപയാണ് നേടിയതെങ്കിൽ, മൂന്നാം ഭാഗം റിലീസ് ദിനത്തിൽ തന്നെ ആ നേട്ടത്തിനടുത്തെത്തുമെന്നാണ് കരുതപ്പെടുന്നത്. എന്നാൽ, വലിയ പ്രതീക്ഷകളോടെ എത്തുന്ന ചിത്രം എന്ന നിലയിൽ പ്രേക്ഷകരുടെ അമിത പ്രതീക്ഷകളെ എങ്ങനെ നേരിടുമെന്നതാണ് അണിയറ പ്രവർത്തകർക്ക് മുന്നിലുള്ള പ്രധാന വെല്ലുവിളി.
വലിയ പ്രതീക്ഷകളില്ലാതെ ചിത്രം കാണാൻ എത്തണമെന്ന് സംവിധായകൻ ജീത്തു ജോസഫ് പ്രേക്ഷകരോട് അഭ്യർത്ഥിച്ചിട്ടുണ്ട്. ആദ്യ രണ്ട് ഭാഗങ്ങളിലെ പ്രധാന താരങ്ങൾക്കൊപ്പം പുതിയ ചില മുഖങ്ങളും മൂന്നാം ഭാഗത്തിൽ അണിനിരക്കുന്നുണ്ട്. എന്തായാലും മലയാള സിനിമയുടെ ബോക്സ് ഓഫീസ് ചരിത്രത്തിൽ പുതിയൊരു അധ്യായം കുറിക്കാൻ 'ദൃശ്യം 3' തയ്യാറെടുക്കുകയാണ്.
Photo and News Source: Asianet News
