പശ്ചിമ ബംഗാൾ നിയമസഭാ തെരഞ്ഞെടുപ്പിൽ വോട്ടർ പട്ടികയിൽ കൃത്രിമം കാണിച്ച് ഫലം അട്ടിമറിച്ചെന്ന ആരോപണത്തിൽ തൃണമൂൽ കോൺഗ്രസിന് പുതിയ ഹരജികൾ സമർപ്പിക്കാൻ സുപ്രീം കോടതി അനുമതി നൽകി. എസ്.ഐ.ആർ (SIR) നടപടികളിലൂടെ വോട്ടർമാരുടെ പേരുകൾ വ്യാപകമായി വെട്ടിമാറ്റിയെന്നും, ഇത് ബി.ജെ.പിക്ക് അനുകൂലമായ സാഹചര്യമൊരുക്കിയെന്നും തൃണമൂൽ കോൺഗ്രസ് ആരോപിക്കുന്നു. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി എന്നിവരടങ്ങിയ ബെഞ്ചാണ് ഹരജി പരിഗണിച്ചത്.
തൃണമൂൽ കോൺഗ്രസിന് വേണ്ടി ഹാജരായ മുതിർന്ന അഭിഭാഷകനും എം.പിയുമായ കല്യാൺ ബാനർജി, വോട്ടർ പട്ടികയിൽ നിന്ന് പേരുകൾ നീക്കം ചെയ്തത് തെരഞ്ഞെടുപ്പ് ഫലത്തെ നിർണ്ണായകമായി സ്വാധീനിച്ചുവെന്ന് വാദിച്ചു. നിയമസഭാ തെരഞ്ഞെടുപ്പിൽ ബി.ജെ.പി 294-ൽ 207 സീറ്റുകൾ നേടിയപ്പോൾ തൃണമൂൽ കോൺഗ്രസ് 80 സീറ്റുകളിലേക്ക് ഒതുങ്ങിയിരുന്നു. 31 മണ്ഡലങ്ങളിൽ വിജയിച്ച സ്ഥാനാർത്ഥികളുടെ ഭൂരിപക്ഷത്തേക്കാൾ കൂടുതൽ വോട്ടുകൾ പട്ടികയിൽ നിന്ന് നീക്കം ചെയ്യപ്പെട്ടിട്ടുണ്ടെന്ന് കണക്കുകൾ വ്യക്തമാക്കുന്നു.
ഒരു മണ്ഡലത്തിൽ തൃണമൂൽ സ്ഥാനാർത്ഥി 862 വോട്ടുകൾക്ക് പരാജയപ്പെട്ടപ്പോൾ, അവിടെ 5000-ത്തിലധികം വോട്ടർമാരെ പട്ടികയിൽ നിന്ന് ഒഴിവാക്കിയിരുന്നുവെന്ന് കോടതിയിൽ ചൂണ്ടിക്കാട്ടി. സംസ്ഥാനത്ത് ബി.ജെ.പിയും തൃണമൂലും തമ്മിലുള്ള വോട്ട് വ്യത്യാസം 32 ലക്ഷമാണെങ്കിലും, ഒഴിവാക്കിയ വോട്ടുകൾക്കെതിരായ അപ്പീലുകൾ 35 ലക്ഷത്തിലധികമാണ്. നിലവിലെ വേഗതയിൽ ഈ അപ്പീലുകൾ തീർപ്പാക്കാൻ നാല് വർഷത്തോളം സമയം വേണ്ടിവരുമെന്ന് മുതിർന്ന അഭിഭാഷക മേനക ഗുരുസ്വാമി കോടതിയെ ബോധിപ്പിച്ചു. മമത ബാനർജിക്കും മറ്റ് ഹരജിക്കാർക്കും ഈ വിഷയത്തിൽ പുതിയ ഹരജികൾ സമർപ്പിക്കാൻ കോടതി അവസരം നൽകിയിട്ടുണ്ട്.
Photo and News Source: Suprabhaatham
