ഉത്തർപ്രദേശിലെ സഹാറൻപൂരിൽ അഞ്ചുമാസം ഗർഭിണിയായിരുന്ന ഇരുപത്തിനാലുകാരി സനയെ ഭർതൃസഹോദരൻ ആമിർ മഴു ഉപയോഗിച്ച് വെട്ടിക്കൊലപ്പെടുത്തി. നനൗട്ട മേഖലയിൽ ഞായറാഴ്ച രാത്രിയായിരുന്നു നാടിനെ നടുക്കിയ ഈ ക്രൂരകൃത്യം അരങ്ങേറിയത്. ലഹരിക്ക് അടിമയായ പ്രതി കൊലപാതകത്തിന് ശേഷം ഏകദേശം ഒരു മണിക്കൂറോളം മൃതദേഹത്തിന് സമീപം തന്നെ നിലയുറപ്പിച്ചു.
തടയാൻ ശ്രമിച്ചവരെ ആക്രമിക്കുമെന്ന് ഭീഷണി മുഴക്കിയ പ്രതിയെ, നാട്ടുകാരുടെയും നിസാർ ഖാൻ എന്ന പ്രദേശവാസിയുടെയും സഹായത്തോടെയാണ് പോലീസ് ഏറെ പണിപ്പെട്ട് കീഴ്പ്പെടുത്തിയത്. പ്രതി ലഹരിക്ക് അടിമയാണെന്നും, സനയുടെ ഭർത്താവായ സൽമാനുമായുള്ള വിവാഹത്തോടുള്ള എതിർപ്പാണ് കൊലപാതകത്തിന് കാരണമെന്നുമാണ് പ്രാഥമിക നിഗമനം.
അതേസമയം, ഇത് ആസൂത്രിതമായ കൊലപാതകമാണെന്ന് സനയുടെ പിതാവ് ആസിഫ് ആരോപിച്ചു. സംഭവസമയത്ത് ഭർത്താവിന്റെ അമ്മയും സഹോദരിയും വീട്ടിൽ നിന്ന് മാറിനിന്നതും, ഭർത്താവ് സൽമാൻ പോലീസ് സ്റ്റേഷനിൽ പോയ സമയത്ത് തന്നെ ആക്രമണം നടന്നതും ദുരൂഹത വർദ്ധിപ്പിക്കുന്നു. നിലവിൽ സനയുടെ ഭർത്താവിനെയും സഹോദരൻ ആമിറിനെയും പോലീസ് കസ്റ്റഡിയിലെടുത്ത് അന്വേഷണം ആരംഭിച്ചിട്ടുണ്ട്.
Photo and News Source: Kerala Online News
