1935-ൽ മൈസൂർ രാജാവായിരുന്ന കൃഷ്ണരാജ വോഡയാറിന്റെ കൊട്ടാരത്തിലെ ആസ്ഥാന പാചകക്കാരനായിരുന്നു കാക്സുര മാഡപ്പ. ഒരു ദിവസം ഉച്ചഭക്ഷണത്തിന് വിളമ്പാൻ വ്യത്യസ്തമായ ഒരു മധുരപലഹാരം തയ്യാറാക്കാൻ അദ്ദേഹം തീരുമാനിച്ചു. കടലപ്പൊടി, നെയ്യ്, പഞ്ചസാര എന്നിവ ഉപയോഗിച്ച് പരീക്ഷണാടിസ്ഥാനത്തിൽ അദ്ദേഹം ഒരു വിഭവം തയ്യാറാക്കി രാജാവിന് വിളമ്പി. ഈ പുതിയ മധുരം രാജാവിന് ഏറെ ഇഷ്ടപ്പെടുകയും അദ്ദേഹം മാഡപ്പയെ അഭിനന്ദിക്കുകയും ചെയ്തു.
ഈ വിഭവത്തിന്റെ പേര് എന്താണെന്ന് രാജാവ് ചോദിച്ചപ്പോൾ, മാഡപ്പ പെട്ടെന്ന് 'മൈസൂർ പാക' എന്ന് മറുപടി നൽകി. കന്നഡ ഭാഷയിൽ 'പാക' എന്നാൽ മിശ്രിതം എന്നാണർത്ഥം. കാലക്രമേണ ഈ വിഭവം 'മൈസൂർ പാക്ക്' എന്ന പേരിൽ ലോകമെമ്പാടും പ്രശസ്തമായി മാറി. ഇന്നും മൈസൂരിന്റെ തനത് രുചിയായി ഇത് നിലനിൽക്കുന്നു.
മൈസൂർ പാക്ക് തയ്യാറാക്കാൻ ഒരു കപ്പ് കടലമാവ്, ഒന്നര കപ്പ് പഞ്ചസാര, ഒന്നര കപ്പ് നെയ്യ് എന്നിവ ആവശ്യമാണ്. ആദ്യം കടലമാവ് ചെറുതായി വറുത്തെടുക്കുക. ശേഷം തീ ഓഫ് ചെയ്ത് കുറച്ച് നെയ്യ് ചേർത്ത് കട്ടയില്ലാതെ കുഴച്ചെടുക്കണം. പഞ്ചസാരയിൽ വെള്ളം ചേർത്ത് നൂൽ പരുവത്തിൽ പാനിയാക്കുക. ഇതിലേക്ക് തയ്യാറാക്കി വെച്ച കടലമാവ് മിശ്രിതവും ബാക്കി നെയ്യും ചേർത്ത് നന്നായി ഇളക്കുക.
മിശ്രിതം പാത്രത്തിന്റെ വശങ്ങളിൽ നിന്ന് വിട്ടു വരുന്ന പരുവമാകുമ്പോൾ തീ ഓഫ് ചെയ്യാം. ഉടൻ തന്നെ നെയ്യ് പുരട്ടിയ പാത്രത്തിലേക്ക് മാറ്റി തണുക്കാൻ അനുവദിക്കുക. നന്നായി തണുത്ത ശേഷം ഇഷ്ടമുള്ള ആകൃതിയിൽ മുറിച്ച് ഉപയോഗിക്കാവുന്നതാണ്. വളരെ ലളിതമായ ചേരുവകൾ കൊണ്ട് വീട്ടിൽ തന്നെ തയ്യാറാക്കാവുന്ന ഒരു മധുരപലഹാരമാണിത്.
Photo and News Source: Mathrubhumi
