പശ്ചിമേഷ്യയിലെ സംഘർഷാവസ്ഥ ആഗോള വിപണിയെയും അതുവഴി ഇന്ത്യയുടെ സാമ്പത്തിക ഭദ്രതയെയും പ്രതികൂലമായി ബാധിക്കുന്നു. അസംസ്കൃത വസ്തുക്കളുടെ വില കുത്തനെ ഉയർന്നതോടെ നിത്യോപയോഗ സാധനങ്ങൾ നിർമിക്കുന്ന കമ്പനികൾ പ്രതിസന്ധിയിലാണ്. നിലനിൽപ്പിനായി ഉൽപ്പന്നങ്ങളുടെ വില വർധിപ്പിക്കുകയോ അല്ലെങ്കിൽ അളവിൽ കുറവ് വരുത്തുകയോ ചെയ്യേണ്ടി വരുമെന്ന നിലപാടിലാണ് നിർമാതാക്കൾ. ഇത് സാധാരണക്കാരുടെ ദൈനംദിന ചെലവുകൾ വർധിപ്പിക്കുകയും സമ്പാദ്യത്തിനുള്ള സാധ്യതകൾ ഇല്ലാതാക്കുകയും ചെയ്യും.
രാജ്യത്തെ പൊതുമേഖലാ എണ്ണക്കമ്പനികൾ കടുത്ത സാമ്പത്തിക സമ്മർദത്തിലൂടെയാണ് കടന്നുപോകുന്നത്. വിലക്കയറ്റം നിയന്ത്രിക്കാൻ കേന്ദ്രസർക്കാർ ഇടപെടലുകൾ നടത്തുന്നുണ്ടെങ്കിലും, സംഘർഷം നീണ്ടുനിന്നാൽ ഇന്ധനവില വർധിപ്പിക്കാൻ സർക്കാർ നിർബന്ധിതമാകും. ഇന്ധനവില വർധനവ് ഉപ്പുതൊട്ട് കർപ്പൂരം വരെയുള്ള എല്ലാ ഉൽപ്പന്നങ്ങളുടെയും വിലയിൽ വലിയ മാറ്റമുണ്ടാക്കും. കഴിഞ്ഞ പത്ത് ആഴ്ചയ്ക്കുള്ളിൽ എണ്ണ, സ്വർണം എന്നിവയുടെ ഇറക്കുമതിക്കായി ഏകദേശം ഒരു ലക്ഷം കോടി രൂപയാണ് രാജ്യത്തിന് പുറത്തേക്ക് ഒഴുകിയത്.
രാജ്യത്തിന്റെ വിദേശനാണ്യ ശേഖരം സുരക്ഷിതമായി നിലനിർത്തേണ്ടത് അനിവാര്യമാണെന്ന് അധികൃതർ ചൂണ്ടിക്കാട്ടുന്നു. ഈ സാഹചര്യത്തിൽ, സാമ്പത്തിക ഭദ്രത ഉറപ്പാക്കാൻ പ്രധാനമന്ത്രി നരേന്ദ്രമോദി പൗരന്മാർക്ക് സ്വയം നിയന്ത്രണങ്ങൾ പാലിക്കാൻ നിർദേശം നൽകിയിട്ടുണ്ട്. ഹോർമുസ് പ്രതിസന്ധിക്ക് പെട്ടെന്നൊരു പരിഹാരം കാണാൻ സാധിക്കാത്ത സാഹചര്യത്തിൽ, സ്ഥിതിഗതികൾ കൂടുതൽ വഷളായാൽ കേന്ദ്രസർക്കാർ കർശനമായ നിയന്ത്രണങ്ങൾ ഏർപ്പെടുത്താൻ സാധ്യതയുണ്ട്. ജനങ്ങളുടെ ആശങ്ക വർധിപ്പിക്കുന്ന ഈ സാഹചര്യത്തിൽ, വരുംദിവസങ്ങളിൽ സാമ്പത്തിക രംഗത്ത് വലിയ മാറ്റങ്ങൾ ഉണ്ടായേക്കാം.
Photo and News Source: Sathyam Online
