പ്രമുഖ എഫ്.എം.സി.ജി (FMCG) കമ്പനിയായ ജ്യോതി ലാബ്സിന് വൻ തിരിച്ചടിയായി ജനപ്രിയ ബ്രാൻഡുകളായ 'പ്രിൽ' (Pril), 'ഫാ' (Fa) എന്നിവയുടെ ലൈസൻസ് നഷ്ടമാകുന്നു. 2026 മെയ് 31-ന് ശേഷം ഈ ബ്രാൻഡുകൾക്കുള്ള ലൈസൻസ് പുതുക്കേണ്ടതില്ലെന്ന് ജർമ്മൻ കമ്പനിയായ ഹെൻകൽ (Henkel) തീരുമാനിച്ചതോടെയാണിത്. കഴിഞ്ഞ ഒന്നര പതിറ്റാണ്ടായി ഇന്ത്യൻ വിപണിയിൽ ഈ ബ്രാൻഡുകളെ വളർത്തിയെടുത്തത് ജ്യോതി ലാബ്സായിരുന്നു.
ഈ സാഹചര്യത്തിൽ കമ്പനി തങ്ങളുടെ ബിസിനസ് തന്ത്രങ്ങളിൽ മാറ്റം വരുത്താൻ ഒരുങ്ങുകയാണ്. ഹെൻകോ (Henko), മിസ്റ്റർ വൈറ്റ് (Mr. White) എന്നീ ബ്രാൻഡുകൾ റോയൽറ്റിയില്ലാത്ത 'പെർപെച്വൽ ലൈസൻസ്' കരാറിൽ ജ്യോതി ലാബ്സിനൊപ്പം തുടരും. കൂടാതെ, മാർഗോ (Margo), നീം ടൂത്ത് പേസ്റ്റ്, തുഹിന, ചെക്ക് തുടങ്ങിയ കമ്പനിയുടെ സ്വന്തം ബ്രാൻഡുകളുടെ പ്രവർത്തനങ്ങളിൽ യാതൊരു മാറ്റവും ഉണ്ടാകില്ലെന്ന് അധികൃതർ വ്യക്തമാക്കി.
ഭാവിയിൽ സ്വന്തം ബ്രാൻഡുകളിൽ കൂടുതൽ ശ്രദ്ധ കേന്ദ്രീകരിച്ച് വിപണി വിഹിതം വർധിപ്പിക്കാനാണ് ജ്യോതി ലാബ്സിന്റെ തീരുമാനം. ലിക്വിഡ് ഡിഷ് വാഷ് വിഭാഗത്തിൽ പ്രില്ലിന് ഉണ്ടായിരുന്ന സ്വാധീനം മറികടക്കാൻ കമ്പനിയുടെ സ്വന്തം ബ്രാൻഡായ 'എക്സോ'യെ (Exo) കൂടുതൽ കരുത്തുറ്റതാക്കും. 2005-06 മുതൽ കമ്പനിയുടെ ഭാഗമായ എക്സോയ്ക്ക് ഇനി മുതൽ കൂടുതൽ നിക്ഷേപവും തന്ത്രപരമായ പ്രാധാന്യവും നൽകി ഒരു സമ്പൂർണ്ണ ഡിഷ്വാഷ് ബ്രാൻഡായി ഉയർത്താനാണ് ലക്ഷ്യമിടുന്നത്.
പ്രില്ലിന്റെ ലൈസൻസ് അവസാനിക്കുന്നത് ഹ്രസ്വകാലത്തേക്ക് വരുമാനത്തെ ബാധിച്ചേക്കാമെങ്കിലും, വിപുലമായ വിതരണ ശൃംഖലയും ഉൽപാദന ശേഷിയും ഉപയോഗിച്ച് ദീർഘകാലാടിസ്ഥാനത്തിൽ വളർച്ച നിലനിർത്താൻ സാധിക്കുമെന്ന് കമ്പനി ഓഹരി ഉടമകളെ അറിയിച്ചു. ഈ മാറ്റം ഉൽപാദന മേഖലയെ തളർത്തില്ലെന്നും ഉത്തരവാദിത്തപരമായ രീതിയിൽ ഈ പരിവർത്തന ഘട്ടത്തെ മറികടക്കുമെന്നും ജ്യോതി ലാബ്സ് സി.എം.ഡി എം. ആർ. ജ്യോതി ആത്മവിശ്വാസം പ്രകടിപ്പിച്ചു. വാർത്ത പുറത്തുവന്നതിന് പിന്നാലെ കമ്പനിയുടെ ഓഹരികളിൽ ഇടിവ് രേഖപ്പെടുത്തിയിട്ടുണ്ട്.
Photo and News Source: Dhanam
