ആഗോള വാഹന വിപണിയിൽ ഇന്ത്യയുടെ അഭിമാനമുയർത്തിക്കൊണ്ട് റോയൽ എൻഫീൽഡ് (Royal Enfield) ചരിത്രനേട്ടം കൈവരിച്ചിരിക്കുന്നു. പ്രശസ്ത ഇറ്റാലിയൻ സ്പോർട്സ് കാർ നിർമ്മാതാക്കളായ ഫെറാറിയെ (Ferrari) പോലും പിന്നിലാക്കി, ലോകത്തിലെ ഏറ്റവും കരുത്തുറ്റ മൂന്നാമത്തെ ഓട്ടോമൊബൈൽ ബ്രാൻഡായി റോയൽ എൻഫീൽഡ് മാറി. പ്രമുഖ ഗ്ലോബൽ ബ്രാൻഡ് വാല്യുവേഷൻ കൺസൾട്ടൻസിയായ 'ബ്രാൻഡ് ഫിനാൻസ്' (Brand Finance) പുറത്തുവിട്ട 2026-ലെ റിപ്പോർട്ടിലാണ് ഈ നേട്ടം രേഖപ്പെടുത്തിയിരിക്കുന്നത്.
ബ്രാൻഡിന്റെ കരുത്ത്, ഉപഭോക്തൃ താൽപ്പര്യം, വിപണിയിലെ മൊത്തത്തിലുള്ള പ്രകടനം എന്നിവ അടിസ്ഥാനമാക്കിയാണ് ഈ റാങ്ക് പട്ടിക തയ്യാറാക്കിയത്. 100-ൽ 88.6 പോയിന്റുകൾ നേടിയാണ് റോയൽ എൻഫീൽഡ് മൂന്നാം സ്ഥാനം സ്വന്തമാക്കിയത്. ആഗോളതലത്തിൽ ഒരു ഇന്ത്യൻ ബ്രാൻഡ് ഇത്രയും വലിയ നേട്ടം കൈവരിക്കുന്നത് ഇത് ആദ്യമായാണ്. 92.5 പോയിന്റുകളുമായി ടൊയോട്ട (Toyota) ഒന്നാമതും, 88.9 പോയിന്റുകളുമായി ബിഎംഡബ്ല്യു (BMW) രണ്ടാമതുമായി പട്ടികയിൽ ഇടംപിടിച്ചു.
ചെന്നൈ ആസ്ഥാനമായി പ്രവർത്തിക്കുന്ന റോയൽ എൻഫീൽഡ് കഴിഞ്ഞ കുറച്ചു വർഷങ്ങളായി ആഗോള വിപണിയിൽ വലിയ കുതിപ്പാണ് നടത്തുന്നത്. യുകെ, യുഎസ്എ തുടങ്ങിയ വിപണികൾക്ക് പുറമെ യൂറോപ്യൻ രാജ്യങ്ങളിലും കമ്പനി തങ്ങളുടെ സാന്നിധ്യം ശക്തമാക്കി. പൈതൃകത്തോടൊപ്പം പുതിയ റെട്രോ സ്റ്റൈൽ മോട്ടോർസൈക്കിളുകൾക്ക് ലഭിക്കുന്ന സ്വീകാര്യതയും ബ്രാൻഡ് മൂല്യം വർദ്ധിപ്പിക്കാൻ സഹായിച്ചു. 350 സിസി മുതൽ 650 സിസി വരെയുള്ള മിഡ്-കപാസിറ്റി മോട്ടോർസൈക്കിൾ വിഭാഗത്തിലെ കമ്പനിയുടെ ആധിപത്യം അന്താരാഷ്ട്ര തലത്തിൽ അംഗീകരിക്കപ്പെട്ടു കഴിഞ്ഞു.
ഇന്ത്യൻ വാഹന വ്യവസായത്തിന്റെ വളർച്ചയുടെ അടയാളം കൂടിയാണ് ഈ നേട്ടം. റോയൽ എൻഫീൽഡിന് പുറമെ ടാറ്റ മോട്ടോർസ് അഞ്ചാം സ്ഥാനത്തും, മാരുതി സുസുക്കി ആറാം സ്ഥാനത്തും, മഹീന്ദ്ര എട്ടാം സ്ഥാനത്തും ഇടംപിടിച്ചു. ലോകമെമ്പാടും വലിയ ആരാധകവൃന്ദമുള്ള ഫെറാറി ഈ പട്ടികയിൽ ഏഴാം സ്ഥാനത്തേക്ക് പിന്തള്ളപ്പെട്ടു എന്നത് ശ്രദ്ധേയമാണ്. ഇന്ത്യയെ ഒരു ആഗോള വാഹന നിർമ്മാണ ഹബ്ബാക്കി മാറ്റുന്നതിൽ ഈ കമ്പനികളുടെ പ്രവർത്തനം വലിയ പങ്കുവഹിക്കുന്നു.
Photo and News Source: DriveSpark
