പശ്ചിമേഷ്യയിലെ നിലവിലെ സംഘർഷാവസ്ഥയുടെ പശ്ചാത്തലത്തിൽ ആഗോള വിപണിയിൽ എൽപിജി സിലിണ്ടറുകളുടെ വിലയിൽ വലിയ വർധനവാണ് രേഖപ്പെടുത്തുന്നത്. എന്നാൽ, ഈ പ്രതിസന്ധികൾക്കിടയിലും ചില രാജ്യങ്ങൾ തങ്ങളുടെ പൗരന്മാർക്ക് വളരെ കുറഞ്ഞ നിരക്കിൽ പാചകവാതകം ലഭ്യമാക്കുന്നു എന്നത് ശ്രദ്ധേയമാണ്. അൾജീരിയ, ഖത്തർ, കുവൈറ്റ് തുടങ്ങിയ രാജ്യങ്ങളാണ് ഈ പട്ടികയിൽ മുൻപന്തിയിലുള്ളത്.
ഇതിൽ ഏറ്റവും കുറഞ്ഞ നിരക്കിൽ എൽപിജി ലഭ്യമാക്കുന്നത് അൾജീരിയയിലാണ്. ഒരു ലിറ്റർ എൽപിജിക്ക് ഏഴ് മുതൽ ഒൻപത് രൂപ വരെ മാത്രമാണ് ഇവിടെ ഈടാക്കുന്നത്. പ്രകൃതി വാതകത്തിന്റെ വൻ ശേഖരവും ആഭ്യന്തര ഉൽപ്പാദനത്തിലെ മികവുമാണ് ഈ വിലക്കുറവിന് പ്രധാന കാരണം. വാതക കയറ്റുമതിയിൽ ആഗോളതലത്തിൽ തന്നെ മുൻപന്തിയിൽ നിൽക്കുന്ന രാജ്യമായതിനാൽ, തങ്ങളുടെ ജനങ്ങൾക്ക് മിതമായ നിരക്കിൽ ഇന്ധനം എത്തിക്കാൻ അൾജീരിയയ്ക്ക് സാധിക്കുന്നു.
ഖത്തറിലും കുവൈറ്റിലും സമാനമായ രീതിയിൽ കുറഞ്ഞ നിരക്കിലാണ് പാചകവാതകം ലഭിക്കുന്നത്. ഖത്തറിൽ ഒരു ലിറ്റർ എൽപിജിക്ക് 10 മുതൽ 13 രൂപ വരെയാണ് വില. കുവൈറ്റിൽ ഇത് 11 മുതൽ 13 രൂപ വരെയാണ്. പെട്രോളിയം ശേഖരങ്ങളുടെ ലഭ്യതയും സർക്കാരുകൾ നൽകുന്ന വലിയ തോതിലുള്ള സബ്സിഡികളുമാണ് ഈ രാജ്യങ്ങളിൽ വിലക്കയറ്റം തടയാൻ സഹായിക്കുന്നത്.
വാതക ഉൽപന്നങ്ങൾക്ക് നികുതി കുറവായതും, സ്വന്തമായി എണ്ണ-വാതക റിസർവോയറുകൾ ഉള്ളതിനാൽ ഉൽപ്പാദനച്ചെലവ് വളരെ കുറവായതും ഈ രാജ്യങ്ങൾക്ക് വലിയ നേട്ടമാണ്. ആഗോള വിപണിയിലെ വിലക്കയറ്റത്തിന്റെ ആഘാതം തങ്ങളുടെ ജനങ്ങളിൽ നേരിട്ട് ബാധിക്കാതിരിക്കാൻ സർക്കാർ തലത്തിൽ സ്വീകരിക്കുന്ന കൃത്യമായ ഇടപെടലുകളാണ് ഈ രാജ്യങ്ങളെ മറ്റ് രാഷ്ട്രങ്ങളിൽ നിന്ന് വ്യത്യസ്തമാക്കുന്നത്.
Photo and News Source: Sathyam Online
