മലയാള സിനിമ പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന മോഹൻലാൽ ചിത്രം 'ദൃശ്യം 3'-ന്റെ ബുക്കിംഗ് ആരംഭിച്ചു. ജീത്തു ജോസഫ് സംവിധാനം ചെയ്യുന്ന ചിത്രം മോഹൻലാലിന്റെ ജന്മദിനമായ മെയ് 21-ന് തിയേറ്ററുകളിൽ എത്തും. ചിത്രത്തിന്റെ ട്രെയിലർ ഇതിനകം തന്നെ വലിയ ചർച്ചയായി മാറിയിട്ടുണ്ട്. ആദ്യ രണ്ട് ഭാഗങ്ങൾ നൽകിയ വമ്പൻ വിജയത്തിന്റെ പിൻബലത്തിൽ, ബോക്സ് ഓഫീസിലെ പല റെക്കോർഡുകളും ഈ ചിത്രം തകർക്കുമെന്നാണ് സിനിമാ ലോകത്തെ വിലയിരുത്തൽ.
മലയാളത്തിലെ ആദ്യത്തെ 50 കോടി ക്ലബ്ബ് ചിത്രം എന്ന നേട്ടം സ്വന്തമാക്കിയ ദൃശ്യത്തിന്റെ മൂന്നാം ഭാഗം, ജോർജുകുട്ടിയുടെയും കുടുംബത്തിന്റെയും ജീവിതത്തിലെ പുതിയ പ്രതിസന്ധികളാണ് പറയുന്നത്. ട്രെയിലർ നൽകുന്ന സൂചനകൾ പ്രകാരം, ഇത്തവണ ജോർജുകുട്ടി അല്പം ഭയത്തിലാണെന്നും കഥയിൽ കൂടുതൽ വൈകാരികമായ മുഹൂർത്തങ്ങൾ ഉണ്ടെന്നുമാണ് വ്യക്തമാകുന്നത്. യു/എ 13+ സർട്ടിഫിക്കറ്റാണ് ചിത്രത്തിന് ലഭിച്ചിരിക്കുന്നത്.
ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ചിത്രത്തിൽ മീന, അൻസിബ ഹസൻ, എസ്തർ അനിൽ, ആശാ ശരത്, സിദ്ധിഖ്, കലാഭവൻ ഷാജോൺ തുടങ്ങിയവർ പ്രധാന വേഷങ്ങളിൽ എത്തുന്നു. പശ്ചിമേഷ്യയിലെ യുദ്ധസാഹചര്യങ്ങൾ കണക്കിലെടുത്ത് ഏപ്രിൽ 2-ൽ നിന്ന് മെയ് 21-ലേക്ക് റിലീസ് മാറ്റുകയായിരുന്നു. അതേസമയം, ചിത്രത്തിന്റെ ഹിന്ദി പതിപ്പ് 2026 ഒക്ടോബർ രണ്ടിന് റിലീസ് ചെയ്യുമെന്നും റിപ്പോർട്ടുകളുണ്ട്.
Photo and News Source: Asianet News
