നിയമസഭാ തിരഞ്ഞെടുപ്പിലെ മികച്ച വിജയത്തിന് ശേഷവും മുഖ്യമന്ത്രി സ്ഥാനത്തെ ചൊല്ലി കോൺഗ്രസിനുള്ളിൽ നടക്കുന്ന തർക്കങ്ങൾ തികച്ചും അപഹാസ്യമാണെന്ന് സി.പി.എം നേതാവ് കെ.കെ. ശൈലജ. ഫേസ്ബുക്ക് കുറിപ്പിലൂടെയാണ് അവർ കോൺഗ്രസ് നേതൃത്വത്തിനെതിരെ രൂക്ഷ വിമർശനം ഉന്നയിച്ചത്. മുഖ്യമന്ത്രിയെ തീരുമാനിക്കുന്നതിലെ ഈ അനിശ്ചിതത്വം ജനാധിപത്യത്തിന് തന്നെ വെല്ലുവിളിയാണെന്ന് അവർ ചൂണ്ടിക്കാട്ടി.
മുഖ്യമന്ത്രി സ്ഥാനത്തേക്ക് ഇത്ര വലിയ തർക്കങ്ങൾ നിലനിൽക്കുമ്പോൾ, ഭാവിയിൽ ഭരണപരമായ കാര്യങ്ങളിൽ ഉചിതമായ തീരുമാനങ്ങൾ എടുക്കാൻ ഈ സർക്കാരിന് കഴിയുമോ എന്ന് ശൈലജ ചോദിച്ചു. എത്രയും വേഗം ഈ അനിശ്ചിതത്വം അവസാനിപ്പിച്ച് സർക്കാർ രൂപീകരിക്കാൻ കോൺഗ്രസ് തയ്യാറാകണം. അല്ലാത്തപക്ഷം കേരളം വലിയൊരു അരാജകത്വത്തിലേക്ക് നീങ്ങുമെന്നും അവർ മുന്നറിയിപ്പ് നൽകി.
തിരഞ്ഞെടുപ്പിൽ എൽ.ഡി.എഫിനുണ്ടായ പരാജയത്തെക്കുറിച്ച് ഗൗരവമായ പരിശോധനകൾ നടക്കുന്നുണ്ടെന്നും ശൈലജ വ്യക്തമാക്കി. പരാജയകാരണങ്ങൾ വിലയിരുത്തി ജനകീയ പ്രശ്നങ്ങളിൽ കൂടുതൽ സജീവമായി ഇടപെട്ടും, രാഷ്ട്രീയ സംഭവവികാസങ്ങൾ ശരിയായി ചർച്ച ചെയ്തും മുന്നോട്ടുപോകാനാണ് പാർട്ടി തീരുമാനിച്ചിരിക്കുന്നത്. ജനങ്ങളുടെ വിശ്വാസം തിരിച്ചുപിടിക്കാനുള്ള പ്രവർത്തനങ്ങൾക്കാണ് മുൻഗണന നൽകുന്നതെന്നും അവർ കൂട്ടിച്ചേർത്തു.
Photo and News Source: Siraj Live
