തമിഴ്നാട്ടിൽ കഴിഞ്ഞ അഞ്ച് ദിവസമായി നിലനിന്നിരുന്ന രാഷ്ട്രീയ അനിശ്ചിതത്വങ്ങൾക്ക് അന്ത്യം കുറിച്ചുകൊണ്ട്, നടനും രാഷ്ട്രീയ നേതാവുമായ ജോസഫ് വിജയ്യുടെ തമിഴക വെട്രി കഴകം (ടി വി കെ) അധികാരത്തിലേക്ക്. വിടുതലൈ ചിരുതൈഗൽ കക്ഷി (വി സി കെ) ഔദ്യോഗികമായി പിന്തുണ പ്രഖ്യാപിച്ചതോടെ വിജയ് തമിഴ്നാടിന്റെ അടുത്ത മുഖ്യമന്ത്രിയാകുമെന്ന് ഉറപ്പായി. ഇന്ത്യൻ യൂണിയൻ മുസ്ലിം ലീഗും (ഐ യു എം എൽ) ടി വി കെക്ക് പിന്തുണ നൽകാൻ തീരുമാനിച്ചു.
ടി വി കെ ജനറൽ സെക്രട്ടറി ആദവ് അർജുനയാണ് വിജയ് മുഖ്യമന്ത്രിയായി സത്യപ്രതിജ്ഞ ചെയ്യുമെന്ന് സ്ഥിരീകരിച്ചത്. നേരത്തെ, ഗവർണർ രാജേന്ദ്ര വിശ്വനാഥ് അർലേക്കറെ മൂന്ന് തവണ കണ്ട് വിജയ് സർക്കാർ രൂപീകരണത്തിന് അവകാശവാദം ഉന്നയിച്ചിരുന്നുവെങ്കിലും, ഭൂരിപക്ഷം തെളിയിക്കാൻ സാധിക്കാത്തതിനാൽ ഗവർണർ ക്ഷണിച്ചിരുന്നില്ല. എന്നാൽ, ഇപ്പോൾ സഖ്യകക്ഷികളുടെ പിന്തുണയോടെ ചിത്രം വ്യക്തമായിരിക്കുകയാണ്.
ഏപ്രിൽ 23-ന് നടന്ന നിയമസഭാ തിരഞ്ഞെടുപ്പിൽ 108 സീറ്റുകളിലാണ് ടി വി കെ വിജയിച്ചത്. പിന്നീട് ഒരു സീറ്റ് ഒഴിഞ്ഞതോടെ അംഗബലം 107 ആയി കുറഞ്ഞു. കോൺഗ്രസിന്റെ അഞ്ച് എം എൽ എമാരും സി പി ഐ, സി പി ഐ എം പാർട്ടികളുടെ രണ്ട് വീതം എം എൽ എമാരും പിന്തുണ പ്രഖ്യാപിച്ചതോടെ വിജയ്യുടെ പക്ഷം ശക്തിപ്പെട്ടു. ഇതിനു പിന്നാലെ മുസ്ലിം ലീഗും വി സി കെയും പിന്തുണ നൽകിയതോടെ വിജയ് പക്ഷത്തെ അംഗങ്ങളുടെ എണ്ണം 118 ആയി ഉയർന്നു.
234 അംഗ തമിഴ്നാട് നിയമസഭയിൽ കേവല ഭൂരിപക്ഷത്തിന് ആവശ്യമായ 118 സീറ്റുകൾ ഇതോടെ ടി വി കെ സഖ്യം ഉറപ്പിച്ചു. അധികാര പങ്കാളിത്തത്തെ ചൊല്ലി നടന്ന നീണ്ട ചർച്ചകൾക്കൊടുവിലാണ് ശനിയാഴ്ച വി സി കെ തങ്ങളുടെ നിലപാട് വ്യക്തമാക്കിയത്. ഇതോടെ തമിഴ്നാടിന്റെ രാഷ്ട്രീയ ചരിത്രത്തിൽ പുതിയൊരു അധ്യായത്തിന് തുടക്കം കുറിച്ചുകൊണ്ട് വിജയ് മുഖ്യമന്ത്രി പദത്തിലേക്ക് എത്തുകയാണ്.
Photo and News Source: Siraj Live
