സിനിമയിലെ ആക്ഷൻ ഹീറോയിൽ നിന്നും തമിഴ് രാഷ്ട്രീയത്തിന്റെ പ്രതീക്ഷയായി മാറിയിരിക്കുകയാണ് വിജയ്. വെള്ളിത്തിരയിൽ അനീതിക്കെതിരെ പോരാടിയ താരം, യഥാർത്ഥ ജീവിതത്തിലും ജനങ്ങളുടെ രക്ഷകനാകുമെന്ന വിശ്വാസമാണ് അദ്ദേഹത്തിന്റെ രാഷ്ട്രീയ പ്രവേശനത്തിന് കരുത്തേകുന്നത്. അൻപത്തിയൊന്നാം വയസ്സിലും യുവത്വം കാത്തുസൂക്ഷിക്കുന്ന വിജയ്യുടെ ഊർജ്ജസ്വലതയ്ക്ക് പിന്നിൽ വർഷങ്ങളായി അദ്ദേഹം പിന്തുടരുന്ന കർശനമായ ജീവിതശൈലിയും അച്ചടക്കവുമുണ്ട്.
വിജയ്യുടെ ഫിറ്റ്നസ് ദിനചര്യയിൽ കാർഡിയോ വ്യായാമങ്ങൾക്ക് വലിയ പ്രാധാന്യമുണ്ട്. ദിവസവും രാവിലെ 40 മിനിറ്റ് നീണ്ടുനിൽക്കുന്ന മിതമായ കാർഡിയോ വ്യായാമങ്ങൾ ഹൃദയാരോഗ്യവും സ്റ്റാമിനയും വർദ്ധിപ്പിക്കാൻ സഹായിക്കുന്നു. ഇതിനുശേഷം ഭാരങ്ങൾ ഉപയോഗിച്ചുള്ള സ്ട്രെങ്ത് ട്രെയിനിംഗും അദ്ദേഹം മുടങ്ങാതെ ചെയ്യുന്നു. സിനിമകളിലെ ആക്ഷൻ രംഗങ്ങൾക്കായി ശരീരത്തെ പാകപ്പെടുത്താൻ ഫങ്ഷണൽ ഫിറ്റ്നസിനാണ് താരം മുൻഗണന നൽകുന്നത്. ഇത് ശരീരത്തിന്റെ മെയ്വഴക്കവും പോസ്ചറും മെച്ചപ്പെടുത്താൻ സഹായിക്കുന്നു.
ജിമ്മിൽ പോകാൻ കഴിയാത്ത ദിവസങ്ങളിൽ നടന്നും സ്ട്രെച്ചിംഗ് വ്യായാമങ്ങൾ ചെയ്തും അദ്ദേഹം കലോറി കുറയ്ക്കാറുണ്ട്. പ്രചാരണ വേളകളിലും വോട്ട് ചെയ്യാനും സൈക്കിൾ ഉപയോഗിക്കുന്ന വിജയ്ക്ക് സൈക്ലിംഗിനോട് വലിയ താൽപ്പര്യമുണ്ട്. മികച്ച നർത്തകൻ കൂടിയായ വിജയ്ക്ക് നൃത്തം ശരീരത്തിന്റെ വഴക്കം നിലനിർത്താനുള്ള മറ്റൊരു മാർഗ്ഗമാണ്. ജങ്ക് ഫുഡും എണ്ണയിൽ വറുത്ത ഭക്ഷണങ്ങളും പൂർണ്ണമായും ഒഴിവാക്കുന്ന താരം, വീട്ടിൽ പാകം ചെയ്ത ഭക്ഷണത്തിനാണ് മുൻഗണന നൽകുന്നത്.
ഇഡ്ഡലി, മുട്ട, പഴങ്ങൾ, പച്ചക്കറികൾ, ചിക്കൻ, മീൻ എന്നിവയടങ്ങുന്ന സമീകൃതാഹാരമാണ് വിജയ്യുടെ ഊർജ്ജത്തിന്റെ ഉറവിടം. മട്ടൻ ബിരിയാണിയും മധുരപലഹാരങ്ങളും ഇഷ്ടമാണെങ്കിലും വളരെ മിതമായ അളവിൽ മാത്രമേ അദ്ദേഹം കഴിക്കാറുള്ളൂ. നേരത്തെ അത്താഴം കഴിക്കുന്ന ശീലവും കൃത്യമായ ഉറക്കവും അദ്ദേഹത്തിന്റെ ആരോഗ്യകരമായ ജീവിതശൈലിയുടെ ഭാഗമാണ്. അച്ചടക്കമുള്ള ഈ ജീവിതരീതിയാണ് അദ്ദേഹത്തെ ഇന്നും യുവത്വത്തോടെ നിലനിർത്തുന്നത്.
Photo and News Source: Samakalika Malayalam
