ആരോഗ്യഗുണങ്ങളുടെ കലവറയാണ് വാല്നട്ട്. ഒമേഗ-3 ഫാറ്റി ആസിഡുകള്, ആന്റിഓക്സിഡന്റുകള്, വിവിധ പോഷകങ്ങള് എന്നിവയാല് സമ്പന്നമായ ഈ ഡ്രൈ ഫ്രൂട്ട് ഹൃദയാരോഗ്യം മെച്ചപ്പെടുത്തുന്നതിനും തലച്ചോറിന്റെ പ്രവര്ത്തനം കാര്യക്ഷമമാക്കുന്നതിനും ഏറെ സഹായിക്കുന്നു. ദിവസവും രണ്ടുമുതല് അഞ്ചുവരെ വാല്നട്ട് കഴിക്കുന്നത് ശരീരത്തിലെ വീക്കം കുറയ്ക്കാനും ദഹനപ്രക്രിയ സുഗമമാക്കാനും ഉത്തമമാണ്.
ഹൃദയാരോഗ്യത്തിന്റെ കാര്യത്തില് വാല്നട്ട് വഹിക്കുന്ന പങ്ക് വളരെ വലുതാണ്. ഇതില് അടങ്ങിയിരിക്കുന്ന ആല്ഫ-ലിനോലെനിക് ആസിഡ് എന്ന ഒമേഗ-3 ഫാറ്റി ആസിഡ് ഹൃദയത്തെ സംരക്ഷിക്കുകയും രക്തത്തിലെ കൊളസ്ട്രോളിന്റെ അളവ് കുറയ്ക്കാന് സഹായിക്കുകയും ചെയ്യുന്നു. ഇത് രക്തസമ്മര്ദ്ദം നിയന്ത്രിക്കാനും അതുവഴി ഹൃദയസംബന്ധമായ അസുഖങ്ങളെ പ്രതിരോധിക്കാനും സഹായിക്കുന്നു.
തലച്ചോറിന്റെ ആരോഗ്യത്തിനും വാല്നട്ട് മികച്ചതാണ്. ഇതിലെ ആന്റിഓക്സിഡന്റുകള് മസ്തിഷ്ക പ്രവര്ത്തനം മെച്ചപ്പെടുത്താനും ഓര്മ്മശക്തി വര്ദ്ധിപ്പിക്കാനും സഹായിക്കുന്നു. വാര്ദ്ധക്യസഹജമായി ഉണ്ടാകുന്ന ബുദ്ധിമാന്ദ്യം കുറയ്ക്കുന്നതിനും ഇത് ഗുണകരമാണ്. കൂടാതെ, കുടലിലെ നല്ല ബാക്ടീരിയകളെ വര്ദ്ധിപ്പിച്ച് ദഹനവ്യവസ്ഥയെ ശക്തിപ്പെടുത്താനും വാല്നട്ടിന് കഴിവുണ്ട്.
ശരീരത്തിലെ വീക്കം കുറയ്ക്കുന്നതിന് സഹായിക്കുന്ന പോളിഫെനോളുകള് വാല്നട്ടില് ധാരാളമായി അടങ്ങിയിട്ടുണ്ട്. സ്തനാര്ബുദം, പ്രോസ്റ്റേറ്റ് ക്യാന്സര് തുടങ്ങിയ ചിലതരം ക്യാന്സറുകളെ പ്രതിരോധിക്കാന് വാല്നട്ടിലെ സംയുക്തങ്ങള് സഹായിക്കുമെന്ന് പഠനങ്ങള് സൂചിപ്പിക്കുന്നു. കൂടാതെ, വിശപ്പ് കുറയ്ക്കാനും ശരീരത്തിന് ആവശ്യമായ ഊര്ജ്ജം നല്കാനും ഇത് സഹായിക്കുന്നതിനാല് ശരീരഭാരം നിയന്ത്രിക്കാന് ആഗ്രഹിക്കുന്നവര്ക്കും വാല്നട്ട് ഭക്ഷണക്രമത്തില് ഉള്പ്പെടുത്താവുന്നതാണ്.
Photo and News Source: Sathyam Online
