എസ്യുവി വിപണിയിൽ ടാറ്റ, മഹീന്ദ്ര, ഹ്യുണ്ടായി തുടങ്ങിയ വമ്പൻമാരോട് മത്സരിക്കാൻ മാരുതി സുസുക്കി തങ്ങളുടെ വിക്ടോറിസ് മോഡലിൽ ആകർഷകമായ ഓഫറുകൾ പ്രഖ്യാപിച്ചു. മെയ് മാസത്തിൽ വിക്ടോറിസിന്റെ സിഎൻജി വേരിയന്റുകൾക്ക് 70,000 രൂപ വരെയാണ് ഡിസ്കൗണ്ട് ലഭിക്കുന്നത്. പെട്രോൾ, സ്ട്രോംഗ് ഹൈബ്രിഡ് മോഡലുകൾക്ക് 50,000 രൂപ വരെയുള്ള ആനുകൂല്യങ്ങളും കമ്പനി വാഗ്ദാനം ചെയ്യുന്നു.
ഇതിനൊപ്പം എക്സ്ചേഞ്ച് ബോണസ്, സ്ക്രാപ്പേജ് ബോണസ്, ഇൻസ്റ്റിറ്റ്യൂഷണൽ ഡിസ്കൗണ്ട് എന്നിവയും ഉപഭോക്താക്കൾക്ക് ലഭ്യമാണ്. 10.50 ലക്ഷം മുതൽ 19.99 ലക്ഷം രൂപ വരെയാണ് ഈ എസ്യുവിയുടെ എക്സ്ഷോറൂം വില. LXi മുതൽ ZXi+ (O) വരെയുള്ള വിവിധ വേരിയന്റുകളിൽ വാഹനം ലഭ്യമാണ്.
സുരക്ഷയുടെ കാര്യത്തിൽ വിട്ടുവീഴ്ചയില്ലാത്ത വിക്ടോറിസ്, ഭാരത് NCAP, ഗ്ലോബൽ NCAP ക്രാഷ് ടെസ്റ്റുകളിൽ 5-സ്റ്റാർ റേറ്റിംഗ് നേടിയിട്ടുണ്ട്. മുതിർന്നവരുടെ സുരക്ഷയിൽ 34-ൽ 33.72 പോയിന്റും കുട്ടികളുടെ സുരക്ഷയിൽ 49-ൽ 41 പോയിന്റും വാഹനം സ്വന്തമാക്കി. ഗ്രാൻഡ് വിറ്റാരയെ അടിസ്ഥാനമാക്കി നിർമിച്ചതാണെങ്കിലും തികച്ചും വ്യത്യസ്തമായ ഡിസൈനും ആകർഷകമായ ലുക്കുമാണ് വിക്ടോറിസിനുള്ളത്.
10.1 ഇഞ്ച് ടച്ച്സ്ക്രീൻ, ഡോൾബി അറ്റ്മോസ് മ്യൂസിക് സിസ്റ്റം, വെന്റിലേറ്റഡ് സീറ്റുകൾ, പനോരമിക് സൺറൂഫ്, ലെവൽ 2 ADAS തുടങ്ങിയ അത്യാധുനിക ഫീച്ചറുകൾ വാഹനത്തിലുണ്ട്. 1.5 ലിറ്റർ മൈൽഡ് ഹൈബ്രിഡ്, സ്ട്രോംഗ് ഹൈബ്രിഡ് പെട്രോൾ എൻജിൻ ഓപ്ഷനുകളിൽ വാഹനം വിപണിയിൽ ലഭ്യമാണ്.
Photo and News Source: DriveSpark
