മലയാള സിനിമയിലെ യുവതാരനിരയിൽ ശ്രദ്ധേയനായ അർജുൻ അശോകൻ തന്റെ അഭിനയ മികവുകൊണ്ട് ചുരുങ്ങിയ കാലം കൊണ്ട് തന്നെ വലിയൊരു ആരാധകവൃന്ദത്തെയാണ് സ്വന്തമാക്കിയത്. ഹരിശ്രീ അശോകന്റെ മകൻ എന്നതിലുപരി, 'പറവ', 'ബ്രമയുഗം', 'രോമാഞ്ചം' തുടങ്ങിയ ഹിറ്റ് ചിത്രങ്ങളിലൂടെ തന്റേതായ ഇടം കണ്ടെത്താൻ താരത്തിന് സാധിച്ചു. സിനിമകൾക്കപ്പുറം വാഹനങ്ങളോടുള്ള അർജുന്റെ കമ്പം സിനിമാലോകത്ത് ഏറെ ചർച്ചയാകാറുണ്ട്.
ഇപ്പോഴിതാ, തന്റെ പ്രിയതമയ്ക്ക് ഒരു സർപ്രൈസ് സമ്മാനവുമായി എത്തിയിരിക്കുകയാണ് താരം. അടുത്തിടെ കുഞ്ചാക്കോ ബോബൻ തന്റെ ഭാര്യ പ്രിയയ്ക്ക് മഹീന്ദ്ര ഥാർ റോക്സ് സമ്മാനിച്ചത് വലിയ വാർത്തയായിരുന്നു. ഇതിന് പിന്നാലെയാണ് അർജുൻ അശോകനും തന്റെ ഭാര്യയ്ക്കായി പുതിയ ഥാർ റോക്സ് വാങ്ങി നൽകിയിരിക്കുന്നത്. താരത്തിന്റെ ഇഷ്ടത്തിനനുസരിച്ച് ചെറിയ മോഡിഫിക്കേഷനുകളോടെയാണ് വാഹനം കൈമാറിയിരിക്കുന്നത്.
മഹീന്ദ്ര ഥാർ റോക്സിന്റെ സ്റ്റാർ എഡിഷൻ മോഡലാണ് അർജുൻ തിരഞ്ഞെടുത്തതെന്നാണ് സൂചന. 12.40 ലക്ഷം മുതൽ 22.81 ലക്ഷം രൂപ വരെയാണ് ഈ എസ്യുവിയുടെ എക്സ്ഷോറൂം വില. 5-ഡോർ മോഡലായ ഥാർ റോക്സ്, മികച്ച റോഡ് പ്രസൻസും കരുത്തുറ്റ എഞ്ചിൻ ശേഷിയും കൊണ്ട് ഇതിനകം തന്നെ വിപണിയിൽ തരംഗമായി മാറിയിട്ടുണ്ട്.
2.2 ലിറ്റർ ഡീസൽ, 2.0 ലിറ്റർ ടർബോ പെട്രോൾ എന്നിങ്ങനെ രണ്ട് എഞ്ചിൻ ഓപ്ഷനുകളിൽ വാഹനം ലഭ്യമാണ്. 6-സ്പീഡ് മാനുവൽ, ഓട്ടോമാറ്റിക് ട്രാൻസ്മിഷൻ സൗകര്യങ്ങളും ഇതിലുണ്ട്. 10.25 ഇഞ്ച് ടച്ച്സ്ക്രീൻ, പനോരമിക് സൺറൂഫ്, ഹാർമൻ കാർഡൺ സൗണ്ട് സിസ്റ്റം തുടങ്ങി അത്യാധുനിക ഫീച്ചറുകളാൽ സമ്പന്നമാണ് ഈ വാഹനം. സുരക്ഷയുടെ കാര്യത്തിലും 6 എയർബാഗുകൾ, 360-ഡിഗ്രി ക്യാമറ, 5-സ്റ്റാർ സേഫ്റ്റി റേറ്റിംഗ് എന്നിവയോടെ ഥാർ റോക്സ് മുൻപന്തിയിൽ നിൽക്കുന്നു.
Photo and News Source: DriveSpark
