ഓട്ടോറിക്ഷാ തൊഴിലാളികളോട് സർക്കാർ കാണിക്കുന്ന കടുത്ത അവഗണന അവസാനിപ്പിക്കണമെന്ന് ബിഎംഎസ് ആവശ്യപ്പെട്ടു. പാലക്കാട് ജില്ലാ ഓട്ടോറിക്ഷ മസ്ദൂർ സംഘത്തിന്റെ ജില്ലാ വാർഷിക സമ്മേളനം ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു ഫെഡറേഷൻ ജനറൽ സെക്രട്ടറി കെ.എൻ. മോഹനൻ. വിവിധ നികുതികളിലൂടെ സർക്കാരിലേക്ക് വലിയൊരു വരുമാനം എത്തിക്കുന്ന മേഖലയായിട്ടും തൊഴിലാളികൾക്ക് അർഹമായ പരിഗണന ലഭിക്കുന്നില്ലെന്ന് അദ്ദേഹം ചൂണ്ടിക്കാട്ടി.
നിരവധി അഭ്യസ്തവിദ്യരായ യുവാക്കൾ ഉപജീവനത്തിനായി ആശ്രയിക്കുന്ന മേഖലയാണ് ഓട്ടോറിക്ഷാ ഗതാഗതം. സാധാരണക്കാരുടെ പ്രധാന ഗതാഗത മാർഗ്ഗമെന്ന നിലയിൽ, ഈ മേഖലയിലെങ്കിലും ഇന്ധന സെസ് ഒഴിവാക്കാൻ സർക്കാർ തയ്യാറാവണമെന്ന് അദ്ദേഹം ആവശ്യപ്പെട്ടു. തൊഴിലാളികളുടെ ജീവിതസാഹചര്യം മെച്ചപ്പെടുത്താൻ സർക്കാർ അടിയന്തരമായി ഇടപെടണമെന്നും അദ്ദേഹം കൂട്ടിച്ചേർത്തു.
ബിഎംഎസ് ജില്ലാ ഓഫീസ് ഹാളിൽ നടന്ന സമ്മേളനത്തിൽ യൂണിയൻ ജില്ലാ പ്രസിഡന്റ് വി. രാജേഷ് ചെത്തല്ലൂർ അധ്യക്ഷത വഹിച്ചു. ബിഎംഎസ് ജില്ലാ സെക്രട്ടറി കെ. രാജേഷ്, യൂണിയൻ ജനറൽ സെക്രട്ടറി ശശി ചോറോട്ടൂർ, സംസ്ഥാന സമിതി അംഗം എസ്. രാജേന്ദ്രൻ, കെ. രാജൻ കൊല്ലങ്കോട്, കെ.ആർ. രാജൻ, എസ്. പരശുറാം തുടങ്ങിയവർ സംസാരിച്ചു.
സമ്മേളനത്തിൽ പുതിയ ഭാരവാഹികളെ ഐകകണ്ഠ്യേന തെരഞ്ഞെടുത്തു. കെ. രാജേഷിനെ പ്രസിഡന്റായും, ശശി ചോറോട്ടൂരിനെ ജനറൽ സെക്രട്ടറിയായും, കെ.ആർ. രാജനെ ട്രഷററായും പുതിയ ഭരണസമിതിയിലേക്ക് തെരഞ്ഞെടുത്തു.
Photo and News Source: Sathyam Online
