തിരുവനന്തപുരം: നിയമസഭാ തിരഞ്ഞെടുപ്പിലെ കനത്ത പരാജയത്തെത്തുടർന്ന് മുഖ്യമന്ത്രി പിണറായി വിജയൻ മാധ്യമങ്ങളെ ഒഴിവാക്കി മൗനവ്രതം പാലിക്കുന്നു. ഫലപ്രഖ്യാപനത്തിനുശേഷം വാർത്താസമ്മേളനവും റദ്ദാക്കിയ അദ്ദേഹം എംഎൽഎ ഓഫീസിലെ സന്ദർശനവും ഒഴിവാക്കി.
സിപിഎമ്മിന്റെ ശക്തികേന്ദ്രങ്ങളായ കണ്ണൂരിലെ പയ്യന്നൂർ, തളിപ്പറമ്പ് തുടങ്ങിയ മണ്ഡലങ്ങളിൽ ഉണ്ടായ തിരിച്ചടി പാർട്ടിയെ തകർത്തിരിക്കുന്നു. കഴിഞ്ഞ തവണ കോൺഗ്രസ് നേടിയ സീറ്റുകളുടെ എണ്ണം പോലും ഈ തവണ ലഭിക്കാത്തത് ഇടതുമുന്നണിക്ക് വലിയ നാണക്കേടാണ്. മുഖ്യമന്ത്രിയുടെ സ്വന്തം മണ്ഡലമായ ധർമ്മടത്തിലും ഭരണവിരുദ്ധ വികാരം ശക്തമായിരുന്നു.
വോട്ടെണ്ണലിന്റെ ആദ്യ ആറ് റൗണ്ടുകളിലും പിന്നിലായ പിണറായി ഏഴാം റൗണ്ടിൽ മാത്രമാണ് ലീഡ് തിരിച്ചുപിടിച്ചത്. കഴിഞ്ഞ തവണ 50,000-ലധികം ഭൂരിപക്ഷം ലഭിച്ച സ്ഥാനത്ത് ഇത്തവണ 19,000 വോട്ടുകളിലേക്ക് ചുരുങ്ങി. കണ്ണൂരിലെ പാർട്ടി ഗ്രാമങ്ങളിലെ വിള്ളൽ സംസ്ഥാനമെങ്ങും പ്രതിഫലിച്ചു.
ഇടതുമുന്നണിയുടെ ഉറച്ച വിജയപ്രതീക്ഷയുള്ള മണ്ഡലങ്ങളിൽ പോലും വോട്ടർമാർ പിന്മാറിയതോടെ പാർട്ടിയില് വലിയ തിരുത്തലുകൾ വരാൻ സാധ്യതയുണ്ട്. നയപരമായ പാളിച്ചകളും ഭരണവിരുദ്ധ വികാരവുമാണ് പരാജയത്തിനു കാരണമെന്ന് രാഷ്ട്രീയ നിരീക്ഷകർ ചൂണ്ടിക്കാണിക്കുന്നു.
Photo and News Source: Janam TV
