കുവൈറ്റ് സിറ്റിയിൽ സമുദ്രമാർഗ്ഗം രാജ്യത്തേക്ക് കടക്കാനുള്ള ശ്രമം നടത്തിയ നാലുപേരെ കുവൈറ്റ് സായുധസേന പിടികൂടി. ഞായറാഴ്ച പുറത്തിറക്കിയ വാർത്താക്കുറിപ്പിലൂടെയാണ് ഈ വിവരം അറിയിച്ചത്. പിടിക്കപ്പെട്ടവരുടെ പേരോ വിശദാംശങ്ങളോ അധികൃതർ വെളിപ്പെടുത്തിയിട്ടില്ല. സംഭവത്തെക്കുറിച്ചുള്ള അന്വേഷണങ്ങൾ തുടരുകയാണ്.
രാജ്യത്തിന്റെ സുരക്ഷാ സാഹചര്യങ്ങളുമായി ബന്ധപ്പെട്ട വിവരങ്ങൾ ഔദ്യോഗിക സ്രോതസ്സുകളിൽ നിന്ന് മാത്രം സ്വീകരിക്കണമെന്ന് കുവൈറ്റ് സൈന്യം ജനങ്ങളോട് അഭ്യർത്ഥിച്ചു. അടിസ്ഥാനരഹിതമായ വാർത്തകളോ കിംവദന്തികളോ പ്രചരിപ്പിക്കരുതെന്നും സൈന്യം നിർദ്ദേശിച്ചു. സോഷ്യൽ മീഡിയയിലൂടെയോ മറ്റു മാർഗ്ഗങ്ങളിലൂടെയോ ഔദ്യോഗിക സ്ഥിരീകരണമില്ലാത്ത വിവരങ്ങൾ പങ്കിടുന്നത് ഒഴിവാക്കണമെന്നും അധികൃതർ ഓർമ്മിപ്പിച്ചു.
Photo and News Source: Sathyam Online
