വാഷിങ്ടണിൽ നിന്നും വന്ന വാർത്തയനുസരിച്ച്, ഇറാനുമായുള്ള യു.എസിന്റെ ശത്രുത ഏപ്രിൽ 8-ന് നിലവിൽ വന്ന വെടിനിർത്തലിലൂടെ അവസാനിച്ചെന്നും, അതിനാൽ ഇറാൻ യുദ്ധം തുടരുന്നതിന് കോൺഗ്രസിന്റെ അനുമതി ആവശ്യമില്ലെന്നും പ്രസിഡന്റ് ഡൊണാൾഡ് ട്രംപ് വ്യക്തമാക്കി.
യു.എസ്. കോൺഗ്രസിന് അയച്ച കത്തിൽ, ട്രംപ് തന്റെ നിലപാട് വ്യക്തമാക്കി. വാർ പവേഴ്സ് ആക്ട് പ്രകാരം, ഒരു രാജ്യത്തിനെതിരേയുള്ള സൈനികനടപടി ആരംഭിക്കുന്നതിന് 60 ദിവസത്തിനകം കോൺഗ്രസിന്റെ അനുമതി തേടിയിരിക്കണം. അല്ലെങ്കിൽ യുദ്ധനടപടികൾ അവസാനിപ്പിക്കണം.
എന്നാൽ, ഫെബ്രുവരി 28-ന് ആരംഭിച്ച യുദ്ധം വെടിനിർത്തലിലൂടെ അവസാനിച്ചെന്നും, ഏപ്രിൽ 7-നുശേഷം ഇറാനിൽ നേരിട്ടുള്ള സൈനികനടപടികളൊന്നും നടക്കാത്തതിനാൽ കോൺഗ്രസിന്റെ അനുമതി തേടേണ്ട ആവശ്യമില്ലെന്നുമാണ് ട്രംപിന്റെ വാദം.
യുദ്ധം പൂർണമായി അവസാനിപ്പിക്കാനും സ്ഥിരമായ സമാധാനക്കരാറിലെത്താനുമുള്ള ചർച്ചകൾ അനിശ്ചിതത്വത്തിലാണ്. ഇറാനിൽ സാധ്യമായ പുതിയ സൈനിക നടപടികളെക്കുറിച്ച് യു.എസ്. സെൻട്രൽ കമാൻഡ് തലവൻ ബ്രാഡ് കൂപ്പർ ട്രംപിന് വിശദീകരണം നൽകിയെന്നുള്ള വാർത്തകളും പുറത്തുവന്നിരുന്നു.
യു.എസിന് മുന്നിലുള്ളത്, ഇറാനെ എന്നേക്കുമായി ഇല്ലാതാക്കുക അല്ലെങ്കിൽ ഒരു കരാറിന് ശ്രമിക്കുക എന്നീ രണ്ട് വഴികളാണ്. ഇതിൽ രണ്ടാമത്തേത് സ്വീകരിക്കാനാണ് ട്രംപ് താത്പര്യമുള്ളതെന്ന് അദ്ദേഹം പറഞ്ഞു.
Photo and News Source: Mathrubhumi
