​വേനൽക്കാലത്ത് നല്ലതാണ്, പക്ഷെ ഡ്രാ​ഗൺ ഫ്രൂട്ടിന് ചില പാർശ്വഫലങ്ങളുണ്ട്

വേനലിൽ പ്രിയങ്കരമായ ഡ്രാഗൺ ഫ്രൂട്ട് പോഷകസമൃദ്ധമാണ്. വിറ്റാമിൻ സി, പ്രോട്ടീൻ, ഇരുമ്പ്, മഗ്നീഷ്യം, ആന്റിഓക്സിഡന്റുകൾ എന്നിവ അടങ്ങിയിരിക്കുന്ന ഈ പഴം ആരോഗ്യത്തിന് നല്ലതാണ്. എന്നാൽ, അമിതമായി കഴിക്കുന്നത് ദോഷകരമായേക്കാം. ധാരാളം നാരുകൾ അടങ്ങിയിരിക്കുന്ന ഡ്രാഗൺ ഫ്രൂട്ട് ദഹനത്തെ സഹായിക്കുമെങ്കിലും, അമിതമായി കഴിക്കുന്നത് വയറ്റിലെ ബ്ലോട്ടിങ്, ഗ്യാസ്, വയറിളക്കം, വേദന എന്നിവയ്ക്ക് കാരണമാകും. ദഹനപ്രശ്നമുള്ളവർ ഇതിൽ നിന്ന് വിട്ടുനിൽക്കുന്നതാണ് നല്ലത്.

ഉയർന്ന രക്തസമ്മർദ്ദം കുറയ്ക്കാൻ ഡ്രാഗൺ ഫ്രൂട്ട് ഫലപ്രദമാണ്. എന്നാൽ, കുറഞ്ഞ രക്തസമ്മർദ്ദമുള്ളവർക്ക് ഇത് അപകടകരമാണ്. തലകറക്കം, ക്ഷീണം, അവശത എന്നിവ ഉണ്ടാകാം. കലോറി കുറവാണെങ്കിലും, പ്രകൃതിദത്ത പഞ്ചസാര അടങ്ങിയിരിക്കുന്നതിനാൽ അമിതമായി കഴിക്കുന്നത് രക്തത്തിലെ പഞ്ചസാരയും കലോറിയും വർദ്ധിപ്പിക്കും. ഇത് ശരീരഭാരം കൂടുന്നതിന് ഇടയാക്കും. പ്രോട്ടീൻ സമ്പന്നമായ ഭക്ഷണവുമായി ചേർത്ത് കഴിക്കുന്നത് നല്ലതാണ്.

അപൂർവ്വമായെങ്കിലും ഡ്രാഗൺ ഫ്രൂട്ട് അലർജി ഉണ്ടാക്കാം. ചൊറിച്ചിൽ, തിണർപ്പ്, നീര്, ശ്വാസതടസം, അപസ്മാരം എന്നിവ ഉണ്ടാകാം. അലർജി സംഭവിക്കുന്നവർ ഇതിൽ നിന്ന് വിട്ടുനിൽക്കുന്നതാണ് ഉചിതം.

Photo and News Source: Samakalika Malayalam