ഐപിഎല്ലിലെ ഗുജറാത്ത് ടൈറ്റൻസ് vs റോയൽ ചലഞ്ചേഴ്സ് ബെംഗളൂരു മത്സരത്തിൽ രജത് പാട്ടിദാറിന്റെ പുറത്താകൽ വലിയ ചർച്ചയായി മാറി. ഡീപ്പ് ബാക്ക് വേർഡ് സ്ക്വയർ ലെഗിൽ ജേസൺ ഹോൾഡർ എടുത്ത ക്യാച്ച് നിയമാനുസൃതമാണോ എന്ന ചോദ്യം ഉയർന്നതോടെ ആർസിബി ടീം പ്രതിഷേധവുമായി രംഗത്തെത്തി.
മത്സരത്തിന്റെ ഗതി തന്നെ മാറ്റിമറിച്ച ഈ തീരുമാനത്തിൽ വെറും ഒരു വിക്കറ്റ് മാത്രമല്ല, കളിയുടെ ആവേശം ചോർത്തുന്ന തീരുമാനമാണെന്നാണ് ബെംഗളൂരു ടീമിന്റെ വാദം. പാട്ടിദാർ പുറത്തായ ഉടൻ തന്നെ വിരാട് കോഹ്ലിയും ഹെഡ് കോച്ച് ആൻഡി ഫ്ലവറും അമ്പയറുടെ തീരുമാനത്തിൽ കടുത്ത അതൃപ്തി പ്രകടിപ്പിച്ചു.
ഹോൾഡർ ഡൈവ് ചെയ്ത് പന്ത് കൈക്കലാക്കിയെങ്കിലും സ്ലൈഡ് ചെയ്യുന്നതിനിടെ പന്ത് നിലത്ത് തട്ടിയെന്നും പന്തിനുമേൽ പൂർണ നിയന്ത്രണം ഉണ്ടായിരുന്നില്ലെന്നും കോഹ്ലി വാദിച്ചു. ഡ്രസ്സിംഗ് റൂമിന് സമീപം മാച്ച് ഒഫീഷ്യലുമായി നടന്ന സംഭാഷണം താരത്തിന്റെ അസ്വസ്ഥത വ്യക്തമാക്കി. തുടർന്ന് ഫ്ലവറും ഒഫീഷ്യൽസിനെ സമീപിച്ച് വിയോജിപ്പ് രേഖപ്പെടുത്തി.
ക്രിക്കറ്റ് നിയമപ്രകാരം ക്യാച്ച് പൂർത്തിയാകുന്നത് പന്ത് ഫീൽഡറുടെ കയ്യിൽ തട്ടുന്നതുമുതൽ പൂർണ നിയന്ത്രണമുള്ളതുവരെ എന്നാണ്. ഹോൾഡറുടെ സ്ലൈഡിൽ പന്ത് നിലത്ത് തട്ടിയത് നിയമാനുസൃതമാണോ എന്ന ചോദ്യം ഉയർന്നുകൊണ്ടിരിക്കുന്നു.
Photo and News Source: Kvartha
