കൊച്ചി: ആക്സിസ് ബാങ്കിന്റെ പൂർണ്ണ ഉടമസ്ഥതയിലുള്ള ആക്സിസ് ഫിനാൻസ് ലിമിറ്റഡ് 2250 കോടി രൂപയുടെ പ്രാഥമിക മൂലധന സമാഹരണം പ്രഖ്യാപിച്ചു. ഇതിൽ കേദാരാ ക്യാപിറ്റലിൽ നിന്ന് 750 കോടി രൂപയും ആക്സിസ് ബാങ്കിൽ നിന്ന് 1500 കോടി രൂപയുടെ റൈറ്റ്സ് ഇഷ്യുവും ഉൾപ്പെടുന്നു. കമ്പനിയുടെ ചരിത്രത്തിലെ ഏറ്റവും വലിയ മൂലധന സമാഹരണമാണിത്. പുറമെ നിന്നുള്ള നിക്ഷേപകനിൽ നിന്ന് ആദ്യമായി മൂലധനം സ്വീകരിക്കുന്നതും ഇതിലൂടെയാണ്. ഈ അധിക മൂലധനം കമ്പനിയുടെ ആസ്തി അടിത്തറ ശക്തിപ്പെടുത്തുകയും വളർച്ചയ്ക്ക് വേഗം പകരുകയും ചെയ്യും.
ടയർ-1 മൂലധനവും മൂലധന പര്യാപ്തത അനുപാതവും ഗണ്യമായി വർദ്ധിക്കുമെന്നാണ് പ്രതീക്ഷിക്കുന്നത്. റീട്ടെയിൽ, എംഎസ്എംഇ, ഹോള്സെയിൽ മേഖലകളിൽ കൂടുതൽ വായ്പകൾ നൽകാനും ഇത് സഹായിക്കും. കഴിഞ്ഞ വർഷങ്ങളായി ശക്തമായ ഭരണനിർവഹണവും റിസ്ക് മാനേജ്മെന്റും അടിസ്ഥാനമാക്കി ഉയർന്ന നിലവാരമുള്ള വായ്പാ ശൃംഖല കെട്ടിപ്പടുക്കാൻ ആക്സിസ് ഫിനാൻസിന് സാധിച്ചു. ആക്സിസ് ഗ്രൂപ്പിന്റെ അവിഭാജ്യ ഘടകമായി ആക്സിസ് ഫിനാൻസിനെ ശക്തിപ്പെടുത്തുന്നതിനുള്ള ദീർഘകാല പ്രതിജ്ഞയാണ് ഈ നിക്ഷേപം. രാജ്യത്തെ മുന്നിര ബാങ്കിംഗ് ഇതര വായ്പാ സ്ഥാപനമായി വളരുന്നതിനൊപ്പം സുസ്ഥിര വളർച്ച കൈവരിക്കാനും ഇത് കമ്പനിയെ സജ്ജമാക്കുന്നു.
ആക്സിസ് ഫിനാൻസ് വളർച്ചയുടെ അടുത്ത ഘട്ടത്തിലേക്ക് കടക്കുമ്പോൾ കേദാരാ ക്യാപിറ്റലിനെ നിക്ഷേപകനായി സ്വാഗതം ചെയ്യുന്നതിൽ സന്തോഷമുണ്ടെന്ന് കമ്പനി പ്രസ്താവിച്ചു.
Photo and News Source: Malayalam Express
