സെന്റ് പീറ്റേഴ്സ്ബർഗിൽ വച്ച് റഷ്യൻ പ്രസിഡന്റ് വ്ലാഡിമിർ പുടിൻ ഇറാൻ വിദേശകാര്യ മന്ത്രി അബ്ബാസ് അരാഗ്ചിയുമായി കൂടിക്കാഴ്ച നടത്തി. പശ്ചിമേഷ്യയിലെ നിലവിലെ പ്രതിസന്ധികളെ തുടർന്ന് ഇറാന്റെ താൽപ്പര്യങ്ങൾ സംരക്ഷിക്കുമെന്നും മേഖലയിൽ സമാധാനം പുനഃസ്ഥാപിക്കാൻ എല്ലാ ശ്രമങ്ങളും നടത്തുമെന്നും പുടിൻ പ്രസ്താവിച്ചു.
ഇറാന്റെ പരമോന്നത നേതാവ് ആയത്തുള്ള ഖാംനഇയിൽ നിന്നുള്ള സന്ദേശം ലഭിച്ചതായി പുടിൻ വെളിപ്പെടുത്തി. ഇറാൻ, പ്രാദേശിക രാജ്യങ്ങൾ എന്നിവരോടുള്ള റഷ്യയുടെ പൂർണ്ണ പിന്തുണ ഉറപ്പിച്ചു. എത്രയും വേഗം സമാധാനം പുനഃസ്ഥാപിക്കാൻ റഷ്യ മുൻകൈ എടുക്കുമെന്നും അദ്ദേഹം പ്രസ്താവിച്ചു. ഇറാൻ ജനത നിലവിലെ പ്രയാസകരമായ സാഹചര്യത്തെ അതിജീവിക്കുമെന്ന പ്രത്യാശയും അദ്ദേഹം പങ്കുവെച്ചു.
മൂന്ന് രാജ്യങ്ങളിലേക്കുള്ള നയതന്ത്ര പര്യടനത്തിന്റെ ഭാഗമായാണ് അരാഗ്ചി റഷ്യയിലെത്തിയത്. മേഖലയിലെ സംഘർഷങ്ങൾ ചർച്ച ചെയ്യാനും ഇരുരാജ്യങ്ങളും തമ്മിലുള്ള നിലപാടുകൾ ഏകോപിപ്പിക്കാനുമാണ് ഈ സന്ദർശനം ലക്ഷ്യമിടുന്നതെന്നും അദ്ദേഹം പറഞ്ഞു. പാകിസ്താൻ, ഒമാൻ സന്ദർശിച്ച ശേഷമാണ് അരാഗ്ചി മോസ്കോയിലെത്തിയത്. റഷ്യൻ വിദേശകാര്യ മന്ത്രി സെർജി ലാവ്റോവുമായും അദ്ദേഹം കൂടിക്കാഴ്ച നടത്തും.
Photo and News Source: Siraj Live
