സ്വന്തമായി ഒരു വീട് എന്നത് മിക്കവരുടെയും ജീവിതത്തിലെ ഏറ്റവും വലിയ സ്വപ്നമാണ്. വര്ഷങ്ങളായുള്ള സമ്പാദ്യവും വായ്പകളും ചേര്ത്താണ് പലരും ഈ ലക്ഷ്യം സാക്ഷാത്കരിക്കുന്നത്. എന്നാല്, വീട് വാങ്ങുന്ന ആവേശത്തിനിടയില് സാമ്പത്തിക ആസൂത്രണത്തില് വരുത്തുന്ന ചെറിയ പിഴവുകള് പിന്നീട് വലിയ മാനസിക സമ്മര്ദത്തിനും സാമ്പത്തിക പ്രതിസന്ധിക്കും കാരണമാകാറുണ്ട്. അതിനാല്, ഭവനവായ്പ എടുക്കുന്നതിന് മുമ്പ് ചില കാര്യങ്ങള് കൃത്യമായി മനസ്സിലാക്കേണ്ടതുണ്ട്.
ബാങ്ക് അനുവദിക്കുന്ന മുഴുവന് തുകയും വായ്പയായി എടുക്കുന്നത് വലിയൊരു അബദ്ധമാണ്. നിങ്ങളുടെ വരുമാനത്തിനനുസരിച്ചല്ല, മറിച്ച് ബാങ്കിന്റെ മാനദണ്ഡങ്ങള് പ്രകാരമാണ് വായ്പ അനുവദിക്കുന്നത്. അതിനാല്, പ്രതിമാസ വരുമാനത്തിന്റെ 25 മുതല് 30 ശതമാനം വരെ മാത്രം ഇ.എം.ഐ (EMI) വരുന്ന രീതിയില് വായ്പ ക്രമീകരിക്കുക. പലിശ നിരക്കിലെ മാറ്റങ്ങളും തൊഴില്പരമായ അനിശ്ചിതത്വങ്ങളും കണക്കിലെടുത്ത് വേണം ഈ തീരുമാനം എടുക്കാന്.
വീടിന്റെ പരസ്യത്തിലുള്ള വില മാത്രം കണ്ട് തീരുമാനമെടുക്കരുത്. സ്റ്റാമ്പ് ഡ്യൂട്ടി, രജിസ്ട്രേഷന് ഫീസ്, ഇന്റീരിയര് വര്ക്കുകള്, ജി.എസ്.ടി (GST), മെയ്ന്റനന്സ് ഡെപ്പോസിറ്റ് തുടങ്ങിയ അധികച്ചെലവുകള് കൂടി കണക്കാക്കി വേണം ബജറ്റ് തയ്യാറാക്കാന്. പലപ്പോഴും ഇത്തരം ചെലവുകള് അഞ്ച് മുതല് പത്ത് ലക്ഷം രൂപ വരെ അധികമായി വരാറുണ്ട്. അതിനാല് വീടിന്റെ യഥാര്ത്ഥ ആകെ ചെലവ് കൃത്യമായി മനസ്സിലാക്കുക.
അതുപോലെ, കൈയിലുള്ള മുഴുവന് സമ്പാദ്യവും വീട് വാങ്ങാനായി ചെലവാക്കരുത്. അപ്രതീക്ഷിത സാഹചര്യങ്ങളെ നേരിടാന് കുറഞ്ഞത് മൂന്ന് മുതല് ആറു മാസം വരെയുള്ള കുടുംബച്ചെലവും ഇ.എം.ഐയും അടങ്ങുന്ന ഒരു എമര്ജന്സി ഫണ്ട് എപ്പോഴും കരുതണം. കൂടാതെ, സഹ വായ്പക്കാരനെ (Co-borrower) തിരഞ്ഞെടുക്കുമ്പോള് അവരുടെ ക്രെഡിറ്റ് സ്കോറും വരുമാന സ്ഥിരതയും പരിശോധിക്കേണ്ടത് അത്യാവശ്യമാണ്.
പലിശ നിരക്ക് മാത്രം നോക്കി ബാങ്ക് തിരഞ്ഞെടുക്കുന്നതും ശരിയായ രീതിയല്ല. വായ്പയുമായി ബന്ധപ്പെട്ട ഒളിഞ്ഞിരിക്കുന്ന ചെലവുകളും നിബന്ധനകളും കൃത്യമായി വായിച്ചു മനസ്സിലാക്കുക. ദീര്ഘകാലാടിസ്ഥാനത്തില് സാമ്പത്തിക സുരക്ഷിതത്വം ഉറപ്പാക്കി വേണം ഭവനവായ്പ സംബന്ധിച്ച തീരുമാനങ്ങള് കൈക്കൊള്ളാന്.
Photo and News Source: Dhanam
