പശ്ചിമേഷ്യയിലെ സംഘർഷാവസ്ഥയെത്തുടർന്ന് ഇന്ത്യയിലെ ഹോട്ടൽ, റെസ്റ്റോറന്റ് മേഖല കടുത്ത പ്രതിസന്ധിയിലാണ്. ഹോർമുസ് കടലിടുക്ക് വഴിയുള്ള പെട്രോളിയം ഉത്പന്നങ്ങളുടെ വിതരണം തടസ്സപ്പെട്ടതോടെ എൽ.പി.ജി ലഭ്യത കുറഞ്ഞത് ഹോട്ടലുകളുടെ പ്രവർത്തനത്തെ സാരമായി ബാധിച്ചു. പല ഹോട്ടലുകളും അടച്ചുപൂട്ടുകയും മെനുവിലെ വിഭവങ്ങൾ വെട്ടിക്കുറയ്ക്കുകയും ചെയ്തതോടെ ഓൺലൈൻ ഭക്ഷണ വിതരണ മേഖലയിലെ ഗിഗ് തൊഴിലാളികളുടെ വരുമാനം കുത്തനെ ഇടിഞ്ഞു.
ഇതിനിടയിലാണ് പൊതുമേഖല എണ്ണക്കമ്പനികൾ വാഹന ഇന്ധനവില വർധിപ്പിച്ചത്. ഇത് ഗിഗ് തൊഴിലാളികളുടെ ജീവിതം കൂടുതൽ ദുസ്സഹമാക്കിയിരിക്കുകയാണ്. ഒരു ഓർഡർ എത്തിക്കുമ്പോൾ ലഭിക്കുന്ന വരുമാനത്തിന്റെ 60 ശതമാനവും ഇന്ധനച്ചെലവിനായി മാറ്റിവെക്കേണ്ടി വരുന്നുണ്ടെന്ന് കേരള സ്റ്റേറ്റ് ഗിഗ് & പ്ലാറ്റ്ഫോം വർക്കേഴ്സ് യൂണിയൻ (സി.ഐ.ടി.യു) സംസ്ഥാന സമിതി അംഗം അരുൺ കൃഷ്ണൻ വ്യക്തമാക്കി. വാഹനങ്ങളുടെ അറ്റകുറ്റപ്പണിക്കുള്ള ചെലവ് കൂടി കണക്കിലെടുക്കുമ്പോൾ തൊഴിലാളികളുടെ കൈകളിൽ തുച്ഛമായ തുക മാത്രമേ അവശേഷിക്കുന്നുള്ളൂ.
ഹോട്ടലുകൾ കുറവായതിനാൽ ഓർഡറുകൾക്കായി കാത്തിരിക്കുന്ന സമയം വർധിക്കുന്നത് തൊഴിലാളികളുടെ പ്രവർത്തനക്ഷമതയെ ബാധിക്കുന്നുണ്ട്. കമ്പനികൾ കിലോമീറ്ററിന് നൽകുന്ന പ്രതിഫലം വർധിപ്പിക്കണമെന്നും, ഉപഭോക്താക്കളിൽ നിന്ന് ഈടാക്കുന്ന സർചാർജുകളിൽ ന്യായമായ വിഹിതം തൊഴിലാളികൾക്ക് നൽകണമെന്നും യൂണിയൻ ആവശ്യപ്പെടുന്നു. സർക്കാർ തലത്തിലുള്ള അടിയന്തര ഇടപെടലുകളും അനിവാര്യമാണ്.
തൊഴിലാളികളുടെ ദുരിതം പരിഹരിക്കാൻ കമ്പനികൾ തയ്യാറാകാത്ത സാഹചര്യത്തിൽ, ഗിഗ് & പ്ലാറ്റ്ഫോം സർവീസ് വർക്കേഴ്സ് യൂണിയൻ (GIPSWU) അഞ്ച് മണിക്കൂർ സൂചന പണിമുടക്ക് പ്രഖ്യാപിച്ചിട്ടുണ്ട്. ആവശ്യങ്ങൾ അംഗീകരിച്ചില്ലെങ്കിൽ വരും ദിവസങ്ങളിൽ ശക്തമായ പ്രതിഷേധ പരിപാടികളുമായി മുന്നോട്ട് പോകാനാണ് തൊഴിലാളി സംഘടനകളുടെ തീരുമാനം.
Photo and News Source: Dhanam
