കേരളത്തിന്റെ അടുത്ത മുഖ്യമന്ത്രിയെ സംബന്ധിച്ച നിർണായക പ്രഖ്യാപനത്തിനായി കാത്തിരിക്കുകയാണ് സംസ്ഥാനം. ഈ സാഹചര്യത്തിൽ, പ്രതിപക്ഷ നേതാവ് വി.ഡി. സതീശന്റെ എറണാകുളത്തെ വസതിക്ക് മുന്നിൽ പ്രവർത്തകരുടെ വൻ തിരക്കാണ് അനുഭവപ്പെടുന്നത്. 'കണ്ണേ, കരളേ വി.ഡി.എസ്സേ' എന്ന മുദ്രാവാക്യങ്ങളുമായി സംസ്ഥാനത്തിന്റെ വിവിധ ഭാഗങ്ങളിൽ നിന്നുള്ള അണികൾ അദ്ദേഹത്തിന്റെ വീടിന് മുന്നിൽ തമ്പടിച്ചിരിക്കുകയാണ്.
അതേസമയം, ഡൽഹിയിൽ കോൺഗ്രസ് ഹൈക്കമാൻഡ് അന്തിമ തീരുമാനത്തിലേക്ക് നീങ്ങുകയാണ്. പാർട്ടി അധ്യക്ഷൻ മല്ലികാർജുൻ ഖാർഗെയുടെ വസതിയിൽ ലോക്സഭ പ്രതിപക്ഷ നേതാവ് രാഹുൽ ഗാന്ധിയുമായി നിർണായക ചർച്ചകൾ നടക്കുന്നുണ്ട്. കെ.സി. വേണുഗോപാൽ എം.പിയെയും ചർച്ചകൾക്കായി വിളിച്ചുവരുത്തിയതായാണ് സൂചനകൾ ലഭിക്കുന്നത്. കേരളത്തിലെ മുതിർന്ന നേതാക്കളുമായി ഹൈക്കമാൻഡ് ഇതിനകം തന്നെ ചർച്ചകൾ പൂർത്തിയാക്കി കഴിഞ്ഞു.
നിലവിൽ ഹൈക്കമാൻഡ് ഒരു പേരിൽ ഏകദേശ ധാരണയിൽ എത്തിയതായാണ് റിപ്പോർട്ടുകൾ സൂചിപ്പിക്കുന്നത്. എ.ഐ.സി.സി അധ്യക്ഷന്റെ ഔദ്യോഗിക അംഗീകാരം ലഭിച്ചാലുടൻ പ്രഖ്യാപനം ഉണ്ടാകും. മുഖ്യമന്ത്രി സ്ഥാനത്തിനായി വി.ഡി. സതീശൻ, രമേശ് ചെന്നിത്തല, കെ.സി. വേണുഗോപാൽ എന്നിവരുടെ ക്യാമ്പുകൾ വലിയ ആകാംക്ഷയിലും ആശങ്കയിലുമാണ്. ഏതാനും മണിക്കൂറുകൾക്കുള്ളിൽ തന്നെ ഔദ്യോഗിക പ്രഖ്യാപനം ഉണ്ടായേക്കുമെന്നാണ് രാഷ്ട്രീയ കേന്ദ്രങ്ങൾ നൽകുന്ന വിവരം.
Photo and News Source: Sathyam Online
