തമിഴ്നാട് നിയമസഭയിൽ നടന്ന നിർണ്ണായകമായ വിശ്വാസ വോട്ടെടുപ്പിൽ വിജയ് സർക്കാർ വൻ വിജയം കരസ്ഥമാക്കി. സഭയിൽ 144 എംഎൽഎമാരുടെ പിന്തുണയോടെയാണ് ടിവികെ (TVK) സർക്കാർ തങ്ങളുടെ ഭൂരിപക്ഷം തെളിയിച്ചത്. വോട്ടെടുപ്പിൽ 22 പേർ സർക്കാരിനെതിരെ വോട്ട് ചെയ്തപ്പോൾ, അഞ്ച് പേർ വിട്ടുനിന്നു. പ്രതിപക്ഷമായ ഡിഎംകെയും അവരുടെ 59 എംഎൽഎമാരും വോട്ടെടുപ്പിന് തൊട്ടുമുമ്പായി സഭയിൽ നിന്ന് ഇറങ്ങിപ്പോയി.
ടിവികെയുടെയും സഖ്യകക്ഷികളുടെയും 120 വോട്ടുകൾക്ക് പുറമെ, എഐഎഡിഎംകെയിലെ വിമത വിഭാഗത്തിന്റെ പിന്തുണയും സർക്കാരിന് ലഭിച്ചു. എഐഎഡിഎംകെയിലെ 24 എംഎൽഎമാർ സർക്കാരിനെ പിന്തുണച്ചതാണ് വിജയത്തിന് കരുത്തായത്. കോൺഗ്രസ് (അഞ്ച്), സിപിഐ (രണ്ട്), സിപിഎം (രണ്ട്), വിസികെ (രണ്ട്), ഐയുഎംഎൽ (രണ്ട്) എന്നീ പാർട്ടികളും വിജയ് സർക്കാരിന് പിന്തുണ പ്രഖ്യാപിച്ചു. എഎംഎംകെയിൽ നിന്ന് പുറത്താക്കപ്പെട്ട എംഎൽഎ കാമരാജും സർക്കാരിന് അനുകൂലമായി വോട്ട് ചെയ്തു.
വിശ്വാസ വോട്ടെടുപ്പിനിടെ എഐഎഡിഎംകെയിൽ ഉണ്ടായ പിളർപ്പ് ശ്രദ്ധേയമായി. പാർട്ടി വിപ്പ് ലംഘിച്ച് എസ് പി വേലുമണിയുടെ നേതൃത്വത്തിലുള്ള ഒരു വിഭാഗം സർക്കാരിനെ പിന്തുണച്ചപ്പോൾ, എടപ്പാടി പളനിസ്വാമി (ഇപിഎസ്) വിഭാഗം ഇതിനെ ശക്തമായി എതിർത്തു. മേയ് 4-ന് നടന്ന തിരഞ്ഞെടുപ്പിൽ ടിവികെയ്ക്ക് കേവല ഭൂരിപക്ഷം ലഭിക്കാത്ത സാഹചര്യത്തിലാണ് വിശ്വാസ വോട്ടെടുപ്പ് അനിവാര്യമായത്. ആകെയുള്ള 234 സീറ്റുകളിൽ 108 സീറ്റുകൾ മാത്രമാണ് ടിവികെയ്ക്ക് ലഭിച്ചിരുന്നത്. ഭൂരിപക്ഷത്തിന് 10 സീറ്റുകൾ കൂടി ആവശ്യമായിരുന്ന സാഹചര്യത്തിലാണ് ഈ വിജയം.
Photo and News Source: Siraj Live
