രാജ്യത്തെ 22 ലക്ഷത്തോളം വിദ്യാർത്ഥികളെ ആശങ്കയിലാഴ്ത്തിയ നീറ്റ് (NEET) പരീക്ഷാ ചോദ്യപേപ്പർ ചോർച്ചയുടെ ഉറവിടം കേരളത്തിൽ നിന്നാണെന്ന സൂചനകളുമായി പ്രാഥമിക അന്വേഷണ റിപ്പോർട്ട്. കേരളത്തിലെ ഒരു മെഡിക്കൽ കോളേജിൽ എംബിബിഎസ് പഠിക്കുന്ന ചുരു സ്വദേശിയായ വിദ്യാർത്ഥി, മെയ് ഒന്നിന് സിക്കറിലുള്ള തന്റെ സുഹൃത്തിന് ഒരു ചോദ്യബാങ്ക് അയച്ചുകൊടുത്തതായാണ് റിപ്പോർട്ടുകൾ വ്യക്തമാക്കുന്നത്. തുടർന്ന് മെയ് രണ്ടിന് ഈ സുഹൃത്ത് സിക്കറിലെ ഒരു പിജി അക്കോമഡേഷൻ നടത്തിപ്പുകാരന് ഇത് കൈമാറുകയും, അദ്ദേഹം അത് അവിടെ താമസിക്കുന്ന വിദ്യാർത്ഥികൾക്കിടയിൽ പ്രചരിപ്പിക്കുകയുമായിരുന്നു.
മെയ് മൂന്നിന് പരീക്ഷ നടന്നതിന് പിന്നാലെ, പരീക്ഷയ്ക്ക് മുൻപേ ചോദ്യങ്ങൾ ലഭിച്ചുവെന്ന പരാതിയുമായി സിക്കറിലെ പിജി നടത്തിപ്പുകാരൻ ഉദ്യോഗ് നഗർ പോലീസ് സ്റ്റേഷനിലും നാഷണൽ ടെസ്റ്റിംഗ് ഏജൻസിയിലും (NTA) സമീപിച്ചു. മെയ് ആറോടെ ഉത്തരസൂചികകളും പരീക്ഷയുമായി ബന്ധപ്പെട്ട ചർച്ചകളും ഓൺലൈനിൽ സജീവമായി. യഥാർത്ഥ ചോദ്യപേപ്പറുമായി വളരെയധികം സാമ്യമുള്ള ഒരു ചോദ്യശേഖരം വിദ്യാർത്ഥികൾക്കിടയിൽ പ്രചരിച്ചതായി ഇതോടെ സ്ഥിരീകരിക്കപ്പെട്ടു. മെയ് ഏഴിന് ക്രമക്കേടുകൾ നടന്നതായി എൻടിഎ ഔദ്യോഗികമായി സമ്മതിച്ചു.
രാജസ്ഥാൻ പോലീസിന്റെ സ്പെഷ്യൽ ഓപ്പറേഷൻസ് ഗ്രൂപ്പ് (SOG) നടത്തിയ അന്വേഷണത്തിൽ സിക്കർ, ജുൻജുനു എന്നിവിടങ്ങളിൽ നിന്നായി 13 പേരെ അറസ്റ്റ് ചെയ്തു. ഗുരുഗ്രാമിലെ ഒരു ഡോക്ടറാണ് ഈ ചോർച്ചയുടെ പ്രധാന സൂത്രധാരനെന്ന് അന്വേഷണ സംഘം സംശയിക്കുന്നു. നാസിക്കിലെ പ്രിന്റിംഗ് പ്രസ്സിൽ നിന്നാണ് ചോദ്യപേപ്പർ ചോർന്നതെന്നാണ് പ്രാഥമിക നിഗമനം. പരീക്ഷയ്ക്ക് മുൻപ് പ്രചരിച്ച 150 പേജുള്ള 'ഗസ് പേപ്പറിൽ' ഉണ്ടായിരുന്ന 410 ചോദ്യങ്ങളിൽ 135 എണ്ണം യഥാർത്ഥ പരീക്ഷാ പേപ്പറുമായി അക്ഷരംപ്രതി സാമ്യമുള്ളതായിരുന്നു എന്നത് ഗൗരവകരമായ വീഴ്ചയാണ്.
Photo and News Source: Samakalika Malayalam
