യുവത്വത്തിന്റെ ഊർജ്ജം നിറച്ചുകൊണ്ട് 'പ്രേംപാറ്റ' എന്ന പുതിയ ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തിറങ്ങി. 'വെയിറ്റിംഗ് ഫോർ ആലിയ' എന്ന കൗതുകകരമായ കുറിപ്പോടെ എത്തിയ പോസ്റ്ററിൽ നായികയുടെ മുഖം വെളിപ്പെടുത്തിയിട്ടില്ലാത്തത് പ്രേക്ഷകരിൽ വലിയ ആകാംക്ഷയാണ് സൃഷ്ടിച്ചിരിക്കുന്നത്. എൻ.എസ്.എസ് ക്യാമ്പിന്റെ പശ്ചാത്തലത്തിൽ കഥ പറയുന്ന ഒരു യൂത്ത് റൊമാന്റിക് എന്റർടെയ്നറാണ് ഈ ചിത്രം.
ആമിർ പള്ളിക്കൽ സംവിധാനം ചെയ്യുന്ന ചിത്രത്തിൽ ജോമോൻ ജ്യോതിർ ആണ് കേന്ദ്ര കഥാപാത്രത്തെ അവതരിപ്പിക്കുന്നത്. 'ആയിഷ', 'ഇഡി' എന്നീ ചിത്രങ്ങൾക്ക് ശേഷം ആമിർ സംവിധാനം ചെയ്യുന്ന ഈ സിനിമയിൽ സോഷ്യൽ മീഡിയ ഇൻഫ്ലുവൻസറുകളും അണിനിരക്കുന്നുണ്ട്. സൈജു കുറുപ്പ്, അനുശ്രീ, സിദ്ദിഖ്, രാജേഷ് മാധവൻ, സഞ്ജു ശിവറാം, ജുനൈസ്, സാബ് ബോയ്, നയന എത്സ, ടിസ് തോമസ്, ഇന്നസെന്റ്, അശ്വിൻ വിജയൻ തുടങ്ങി വലിയൊരു താരനിര തന്നെ ചിത്രത്തിലുണ്ട്.
സ്റ്റുഡിയോ ഔട്ട്സൈഡേഴ്സിന്റെ ബാനറിൽ നിർമ്മിക്കുന്ന ഈ ചിത്രത്തിന് തിരക്കഥ ഒരുക്കുന്നത് ലിജീഷ് കുമാർ ആണ്. രണദിവെ ഛായാഗ്രഹണവും ആകാശ് ജോസഫ് വർഗീസ് എഡിറ്റിംഗും നിർവ്വഹിക്കുന്നു. അജിത് മേനോൻ സംഗീതം നൽകുന്ന ചിത്രം സെൻട്രൽ പിക്ചേഴ്സ് ആണ് വിതരണത്തിന് എത്തിക്കുന്നത്.
Photo and News Source: Kerala Kaumudi Latest
