ഇന്ത്യൻ ഇലക്ട്രിക് വാഹന വിപണിയിൽ മത്സരം കടുക്കുന്നതിനിടെ, ടാറ്റ മോട്ടോഴ്സ് തങ്ങളുടെ ജനപ്രിയ മൈക്രോ ഇലക്ട്രിക് എസ്യുവിയായ പഞ്ച് ഇവിയുടെ പഴയ സ്റ്റോക്കുകൾ വിറ്റഴിക്കാൻ വമ്പൻ ഓഫറുകൾ പ്രഖ്യാപിച്ചു. ഓട്ടോകാർ ഇന്ത്യയുടെ റിപ്പോർട്ടുകൾ പ്രകാരം, പഞ്ച് ഇവിയുടെ പ്രീ-ഫെയ്സ്ലിഫ്റ്റ് മോഡലുകൾക്ക് 2.15 ലക്ഷം രൂപ വരെയാണ് ആനുകൂല്യങ്ങൾ ലഭിക്കുന്നത്.
MY25, MY24 ലോംഗ് റേഞ്ച് വകഭേദങ്ങൾക്ക് 1.10 ലക്ഷം രൂപ ബോണസ്, 55,000 രൂപ സ്ക്രാപ്പേജ് ആനുകൂല്യം, 50,000 രൂപ ലോയൽറ്റി ഓഫർ എന്നിങ്ങനെയാണ് ആനുകൂല്യങ്ങൾ ക്രമീകരിച്ചിരിക്കുന്നത്. മീഡിയം റേഞ്ച് സ്മാർട്ട് വകഭേദങ്ങൾക്ക് 1.60 ലക്ഷം രൂപയും മറ്റ് വേരിയന്റുകൾക്ക് 1.90 ലക്ഷം രൂപ വരെയും കിഴിവ് ലഭിക്കും. നഗരങ്ങൾക്കും സ്റ്റോക്ക് ലഭ്യതയ്ക്കും അനുസരിച്ച് ഈ ഓഫറുകളിൽ മാറ്റം വരാം.
ടാറ്റയുടെ അത്യാധുനിക 'ആക്ടി ഡോട്ട് ഇവി' (acti.ev) പ്ലാറ്റ്ഫോമിലാണ് പഞ്ച് ഇവി നിർമ്മിച്ചിരിക്കുന്നത്. 25kWh, 35kWh എന്നിങ്ങനെ രണ്ട് ബാറ്ററി ഓപ്ഷനുകളിൽ വാഹനം ലഭ്യമാണ്. ഇതിൽ 35kWh ബാറ്ററി പതിപ്പിന് 365 കിലോമീറ്റർ റേഞ്ചാണ് കമ്പനി അവകാശപ്പെടുന്നത്. 122 bhp കരുത്തും 190 Nm ടോർക്കും ഉൽപ്പാദിപ്പിക്കാൻ ഈ പതിപ്പിന് സാധിക്കും.
9.5 സെക്കൻഡിനുള്ളിൽ പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കാൻ കഴിയുന്ന പഞ്ച് ഇവിയുടെ ടോപ്പ് സ്പീഡ് മണിക്കൂറിൽ 140 കിലോമീറ്ററാണ്. നിലവിൽ 9.99 ലക്ഷം മുതൽ 14.44 ലക്ഷം രൂപ വരെയാണ് വാഹനത്തിന്റെ എക്സ്ഷോറൂം വില. പുതിയ ഫെയ്സ്ലിഫ്റ്റ് മോഡലുകൾക്ക് നിലവിൽ ഓഫറുകൾ ലഭ്യമല്ലെങ്കിലും, ബാറ്ററി സർവീസ് പ്രോഗ്രാം വഴി കുറഞ്ഞ നിരക്കിൽ വാഹനം സ്വന്തമാക്കാനുള്ള സൗകര്യം ടാറ്റ ഒരുക്കിയിട്ടുണ്ട്.
Photo and News Source: DriveSpark
