ന്യൂദൽഹിയിൽ വേനൽച്ചൂട് 36 ഡിഗ്രിയിലേക്ക് ഉയർന്നതോടെ സർക്കാർ പകൽ സമയത്ത് പുറത്തിറങ്ങുന്നതിനും സ്കൂളുകളുടെ പ്രവർത്തനത്തിനുമായി വ്യക്തമായ മാനദണ്ഡങ്ങൾ പുറപ്പെടുവിച്ചു. കേരളത്തിലെ ചൂട് സംസ്ഥാന ശരാശരി 34 ഡിഗ്രിയാണ്. പാലക്കാട് ജില്ലയിൽ 41 ഡിഗ്രിയും സംസ്ഥാനത്താകെ 38 ഡിഗ്രിയുമാണ് അനുഭവപ്പെടുന്നത്.
ദേശീയ തലസ്ഥാനത്തും സമീപ പ്രദേശങ്ങളിലും തുടരുന്ന ഉഷ്ണതരംഗത്തിന്റെ പ്രതികൂല ഫലങ്ങളിൽ നിന്ന് വിദ്യാർത്ഥികളെ സംരക്ഷിക്കാൻ ദൽഹി സർക്കാർ പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചു. രാവിലെയുള്ള അസംബ്ലികൾ റദ്ദാക്കുകയോ തണലുള്ള ഇൻഡോർ പ്രദേശങ്ങളിലോ മാത്രമായി പരിമിതപ്പെടുത്തുകയോ ചെയ്യണമെന്നാണ് നിർദ്ദേശം. വെള്ളം കുടിക്കാൻ വിദ്യാർത്ഥികളെ ഓർമ്മിപ്പിക്കുന്നതിനും, ഓരോ 45 മുതൽ 60 മിനിറ്റിലും ഒരു മണി മുഴക്കാൻ നിർദ്ദേശം നൽകിയിട്ടുണ്ട്.
ചൂടുമായി ബന്ധപ്പെട്ട രോഗങ്ങളിൽ നിന്ന് കുട്ടികളെ സംരക്ഷിക്കുന്നതിനും നിർജ്ജലീകരണ സാധ്യത കുറയ്ക്കുന്നതിനുമാണ് ഈ നടപടികൾ ലക്ഷ്യമിടുന്നത്. മാതാപിതാക്കൾക്ക് കാലാവസ്ഥാ സാഹചര്യങ്ങളെക്കുറിച്ച് പതിവായി അപ്ഡേറ്റുകൾ നൽകാൻ അധ്യാപകർക്ക് നിർദ്ദേശം. വിദ്യാർത്ഥികൾക്ക് ഉഷ്ണതരംഗ അവബോധത്തെയും സുരക്ഷയെയും കുറിച്ച് ബോധവൽക്കരണം നൽകും.
ചൂടിന് അനുയോജ്യമായ ലൈറ്റ്, കോട്ടൺ വസ്ത്രങ്ങൾ ധരിച്ച് കുട്ടികളെ സ്കൂളിലേക്ക് അയയ്ക്കാൻ മാതാപിതാക്കളോട് നിർദ്ദേശിച്ചിട്ടുണ്ട്. നിലവിലുള്ള ഉഷ്ണതരംഗ സമയത്ത് വിദ്യാർത്ഥികൾക്കിടയിൽ വ്യക്തിഗത ശുചിത്വം പാലിക്കേണ്ടതിന്റെ പ്രാധാന്യവും ഊന്നിപ്പറയുന്നു.
Photo and News Source: Janmabhumi
