മലയാളി പ്രേക്ഷകർക്ക് സുപരിചിതയായ അവതാരകയാണ് രഞ്ജിനി ഹരിദാസ്. സമൂഹമാധ്യമങ്ങളിൽ സജീവമായ താരം തന്റെ വിശേഷങ്ങളും ജീവിതാനുഭവങ്ങളും ആരാധകരുമായി നിരന്തരം പങ്കുവെക്കാറുണ്ട്. തന്റെ ജീവിതത്തിൽ ഏറ്റവും വലിയ സ്വാധീനം ചെലുത്തിയ വ്യക്തി തന്റെ അമ്മ സുജാതയാണെന്ന് രഞ്ജിനി പലതവണ വ്യക്തമാക്കിയിട്ടുണ്ട്. മാതൃദിനത്തോടനുബന്ധിച്ച് അമ്മയെക്കുറിച്ച് താരം പങ്കുവെച്ച പുതിയ കുറിപ്പ് ഇപ്പോൾ സമൂഹമാധ്യമങ്ങളിൽ ഏറെ ശ്രദ്ധ നേടുകയാണ്.
അമ്മക്കൊപ്പമുള്ള ചിത്രത്തിനൊപ്പം അച്ഛന്റെ ഒരു ബ്ലാക്ക് ആൻഡ് വൈറ്റ് ഫോട്ടോയും കയ്യിലേന്തിയാണ് രഞ്ജിനി ഈ ചിത്രം പങ്കുവെച്ചിരിക്കുന്നത്. തനിക്ക് ഏഴു വയസ്സുള്ളപ്പോഴാണ് അച്ഛൻ മരിക്കുന്നത്. അതിനാൽ അച്ഛനെ അടുത്തറിയാൻ തനിക്ക് സാധിച്ചിട്ടില്ലെന്ന് രഞ്ജിനി പറയുന്നു. അച്ഛന്റെ മരണശേഷം അമ്മ കടന്നുപോയ കഠിനമായ വഴികളെക്കുറിച്ചും താരം ഓർമ്മിക്കുന്നു.
തന്റെ ജീവിതത്തിൽ അച്ഛന്റെയും അമ്മയുടെയും സ്ഥാനത്ത് ഒരാൾ മാത്രമാണ് ഉണ്ടായിരുന്നതെന്ന് രഞ്ജിനി കുറിക്കുന്നു. "എന്റെ സംരക്ഷകയായി, എനിക്കു വേണ്ടി എല്ലാം നൽകുന്നവളായി, എന്റെ കരുത്തായി അമ്മ എപ്പോഴും കൂടെയുണ്ടായിരുന്നു. ഒരമ്മ ചെയ്യേണ്ടതിനപ്പുറം അച്ഛന്റെ മരണശേഷം അമ്മയ്ക്ക് ചെയ്യേണ്ടി വന്നു. പരാതികളില്ലാതെ, തളരാതെ, ഒന്നും തിരികെ പ്രതീക്ഷിക്കാതെ അമ്മ അത് ചെയ്തു."
ഇന്ന് താൻ എന്താണോ, അതിന് കാരണം അമ്മയാണെന്നും രഞ്ജിനി കൂട്ടിച്ചേർക്കുന്നു. തന്റെ ഏറ്റവും വലിയ ആരാധികയും ഒപ്പം ഏറ്റവും വലിയ വിമർശകയും അമ്മയാണെന്നും, തനിക്ക് എല്ലാം അമ്മയാണെന്നും പറഞ്ഞുകൊണ്ടാണ് താരം കുറിപ്പ് അവസാനിപ്പിക്കുന്നത്. രഞ്ജിനിയുടെ ഈ വൈകാരികമായ കുറിപ്പ് ആരാധകർ വലിയ സ്നേഹത്തോടെയാണ് ഏറ്റെടുത്തിരിക്കുന്നത്.
Photo and News Source: Asianet News
