പശ്ചിമബംഗാൾ മുഖ്യമന്ത്രിയായി ചുമതലയേറ്റ സുവേന്ദു അധികാരി തന്റെ ആദ്യ മന്ത്രിസഭായോഗത്തിന് ശേഷം സംസ്ഥാനത്തിന്റെ വികസനവും സുരക്ഷയും ലക്ഷ്യമിട്ടുള്ള ആറ് സുപ്രധാന തീരുമാനങ്ങൾ പ്രഖ്യാപിച്ചു. അതിർത്തി സംരക്ഷണം, തൊഴിൽ അവസരങ്ങൾ, ഭരണപരിഷ്കാരം എന്നിവയ്ക്ക് മുൻഗണന നൽകിയാണ് പുതിയ സർക്കാർ പ്രവർത്തനം ആരംഭിച്ചിരിക്കുന്നത്.
ബംഗ്ലാദേശ് അതിർത്തിയിലെ 600 ഏക്കർ ഭൂമി ബിഎസ്എഫിന് കൈമാറാൻ സർക്കാർ തീരുമാനിച്ചു. അതിർത്തിയിൽ വേലി നിർമിച്ച് നിയമവിരുദ്ധ കുടിയേറ്റവും കള്ളക്കടത്തും തടയുകയാണ് ഇതിന്റെ ലക്ഷ്യം. 45 ദിവസത്തിനുള്ളിൽ ഭൂമി കൈമാറ്റം പൂർത്തിയാക്കുമെന്ന് മുഖ്യമന്ത്രി വ്യക്തമാക്കി. കൂടാതെ, സെൻസസ് നടപടികൾ തിങ്കളാഴ്ച മുതൽ ആരംഭിക്കുമെന്നും മുൻ സർക്കാർ ഇത് വൈകിപ്പിച്ചതിനെക്കുറിച്ച് അന്വേഷണം നടത്തുമെന്നും അദ്ദേഹം അറിയിച്ചു.
ഭരണരംഗത്ത് വലിയ മാറ്റങ്ങൾ വരുത്തിക്കൊണ്ട്, ഐപിസിക്ക് പകരം ഭാരതീയ ന്യായസംഹിത (ബിഎൻഎസ്) സംസ്ഥാനത്ത് നടപ്പാക്കാൻ ഉത്തരവിട്ടു. മുൻ സർക്കാർ ബിഎൻഎസ് നടപ്പാക്കാൻ തയ്യാറായിരുന്നില്ല. കൂടാതെ, ഐഎഎസ്, ഐപിഎസ് ഉദ്യോഗസ്ഥരെ പരിശീലനത്തിനായി മറ്റ് സംസ്ഥാനങ്ങളിലേക്ക് അയക്കുന്ന രീതി റദ്ദാക്കി. തൊഴിൽ അന്വേഷകർക്ക് ആശ്വാസമായി, മുൻ വർഷങ്ങളിൽ അവസരം നഷ്ടപ്പെട്ടവർക്ക് പ്രായപരിധിയിൽ അഞ്ച് വർഷത്തെ ഇളവും സർക്കാർ പ്രഖ്യാപിച്ചു.
ആയുഷ്മാൻ ഭാരത് ഉൾപ്പെടെയുള്ള കേന്ദ്രസർക്കാരിന്റെ ജനക്ഷേമ പദ്ധതികൾ സംസ്ഥാനത്ത് ഉടൻ നടപ്പാക്കുമെന്ന് മുഖ്യമന്ത്രി സുവേന്ദു അധികാരി ഉറപ്പുനൽകി. തിരഞ്ഞെടുപ്പ് സമാധാനപരമായി പൂർത്തിയാക്കാൻ സഹായിച്ച ജനങ്ങൾക്കും തിരഞ്ഞെടുപ്പ് കമ്മീഷനും അദ്ദേഹം നന്ദി അറിയിച്ചു. രാഷ്ട്രീയ പോരാട്ടത്തിനിടെ ജീവൻ നഷ്ടപ്പെട്ടവരെ അനുസ്മരിച്ച അദ്ദേഹം, അവർക്ക് നീതി ഉറപ്പാക്കുമെന്നും എല്ലാവർക്കും വേണ്ടിയാണ് സർക്കാർ പ്രവർത്തിക്കുന്നതെന്നും കൂട്ടിച്ചേർത്തു.
Photo and News Source: Mathrubhumi
