കോൺഗ്രസിന്റെ മുഖ്യമന്ത്രി സ്ഥാനാർത്ഥി നിർണ്ണയവുമായി ബന്ധപ്പെട്ട് നിർണ്ണായക അഭിപ്രായപ്രകടനവുമായി ഐഎൻടിയുസി സംസ്ഥാന പ്രസിഡന്റ് ആർ ചന്ദ്രശേഖരൻ രംഗത്ത്. ജയിച്ചുവന്ന എംഎൽഎമാരിൽ ഒരാൾ തന്നെ മുഖ്യമന്ത്രിയാകണമെന്നാണ് അദ്ദേഹം വ്യക്തമാക്കിയത്. ജനങ്ങൾ വോട്ട് ചെയ്തത് എംഎൽഎമാരിൽ ഒരാൾ മുഖ്യമന്ത്രിയാകുമെന്ന് പ്രതീക്ഷിച്ചാണെന്നും, അതിനാൽ എംഎൽഎ അല്ലാത്തവർ ഈ സ്ഥാനത്തേക്ക് വരുന്നത് ഉചിതമല്ലെന്നും അദ്ദേഹം അഭിപ്രായപ്പെട്ടു.
1970 മുതലുള്ള കോൺഗ്രസിന്റെ ചരിത്രം പരിശോധിച്ചാൽ പ്രതിപക്ഷ നേതാവായിരുന്നവർ പിന്നീട് മുഖ്യമന്ത്രിയാകുന്ന രീതിയാണ് നിലവിലുള്ളതെന്ന് അദ്ദേഹം ചൂണ്ടിക്കാട്ടി. കെ സി വേണുഗോപാലിനെ മുഖ്യമന്ത്രി സ്ഥാനത്തേക്ക് ഉയർത്തിക്കാട്ടുന്നതിനെ പരോക്ഷമായി തള്ളിക്കൊണ്ടാണ് ആർ ചന്ദ്രശേഖരന്റെ ഈ പ്രതികരണം. പാർട്ടിക്കകത്ത് ഗ്രൂപ്പുകളുടെ കാലം കഴിഞ്ഞുവെന്നും, വലിയൊരു വിജയം ഉണ്ടാകുമ്പോൾ സ്വാഭാവികമായും ചർച്ചകൾ നടക്കുമെന്നും അദ്ദേഹം കൂട്ടിച്ചേർത്തു.
സംസ്ഥാനത്ത് മുഖ്യമന്ത്രിയെ തെരഞ്ഞെടുക്കുന്നതുമായി ബന്ധപ്പെട്ട ചർച്ചകൾ സജീവമാകുന്നതിനിടെയാണ് ഐഎൻടിയുസി നേതാവിന്റെ ഈ നിലപാട്. കെ സി വേണുഗോപാലിനെ പിന്തുണച്ച് കെ എം അഭിജിത്ത് നടത്തിയ പ്രസ്താവനകൾക്കെതിരെ കോൺഗ്രസ് പ്രവർത്തകർക്കിടയിൽ തന്നെ അതൃപ്തി നിലനിൽക്കുന്നുണ്ട്. ഈ സാഹചര്യത്തിൽ ആർ ചന്ദ്രശേഖരന്റെ വാക്കുകൾ പാർട്ടിയിൽ വലിയ ചർച്ചകൾക്ക് വഴിവെച്ചിരിക്കുകയാണ്.
Photo and News Source: Kairali News
