നിയമസഭാ തിരഞ്ഞെടുപ്പിലെ തിരിച്ചടിക്ക് പിന്നാലെ, മുൻ മന്ത്രിയും എൽഡിഎഫ് സ്ഥാനാർത്ഥിയുമായ കടകംപള്ളി സുരേന്ദ്രനെതിരെ കഴക്കൂട്ടത്ത് പ്രതിഷേധം ശക്തമാകുന്നു. കടകംപള്ളിയുടെയും കഴക്കൂട്ടം ഏരിയ കമ്മിറ്റി അംഗവും ഡിവൈഎഫ്ഐ ജില്ലാ സെക്രട്ടറിയേറ്റ് അംഗവുമായ ശ്യാം മോഹന്റെയും ചിത്രങ്ങൾ ഉൾപ്പെടുത്തിയാണ് പ്രദേശത്ത് ഫ്ളക്സ് ബോർഡുകൾ പ്രത്യക്ഷപ്പെട്ടത്. 'കുളത്തൂർ സഖാക്കൾ' എന്ന പേരിലാണ് ഈ ബോർഡുകൾ സ്ഥാപിച്ചിരിക്കുന്നത്.
'പണാധിപത്യം തുലയട്ടെ, ജനാധിപത്യം വളരട്ടെ. ഇവിടെ പാർട്ടിയാണ് വേണ്ടത്, വ്യക്തികളല്ല. ഇവിടെ നമ്മുടെ പ്രസ്ഥാനത്തെ നമുക്ക് തിരിച്ചുതരൂ' എന്നാണ് ഫ്ളക്സിലെ പ്രധാന സന്ദേശം. വ്യക്തികേന്ദ്രീകൃതമായ പ്രവർത്തനരീതികൾക്കെതിരെയും പാർട്ടിയിലെ നിലവിലെ പോക്കിലും കടുത്ത അതൃപ്തിയാണ് ഇതിലൂടെ പ്രവർത്തകർ പ്രകടിപ്പിക്കുന്നത്.
നേരത്തെ പാർട്ടി വിട്ടുപോയ ചിലരെ തിരിച്ചെടുത്തതുമായി ബന്ധപ്പെട്ട് കഴക്കൂട്ടം ഏരിയ കമ്മിറ്റിയിലും കുളത്തൂർ മേഖലയിലും വലിയ വിഭാഗീയത നിലനിന്നിരുന്നു. തദ്ദേശ തിരഞ്ഞെടുപ്പുകളിൽ കുളത്തൂർ, ആറ്റിപ്ര മേഖലകളിൽ സിപിഎമ്മിന് കനത്ത പരാജയം നേരിടേണ്ടി വന്നിരുന്നു. ഇതിന് പിന്നാലെ നിയമസഭാ തിരഞ്ഞെടുപ്പിലും പ്രതീക്ഷിച്ച വിജയം കൈവരിക്കാൻ പാർട്ടിക്ക് സാധിച്ചില്ല.
കഴക്കൂട്ടം മണ്ഡലത്തിൽ ബിജെപി സ്ഥാനാർത്ഥി വി. മുരളീധരൻ വിജയിച്ചത് സിപിഎം നേതൃത്വത്തിന് വലിയ തിരിച്ചടിയായി മാറിയിരിക്കുകയാണ്. പാർട്ടിയുടെ അടിത്തറ തകരുന്നതിലും നേതൃത്വത്തിന്റെ തീരുമാനങ്ങളിലും പ്രതിഷേധിച്ചാണ് അണികൾ പരസ്യമായി രംഗത്തെത്തിയിരിക്കുന്നത്.
Photo and News Source: Kerala Kaumudi Latest
