ഹൈക്കോടതി ഉത്തരവിനെത്തുടർന്ന് ഇടുക്കി പൂപ്പാറയിൽ നടന്ന കുടിയൊഴിപ്പിക്കലിൽ ദുരിതത്തിലായ കുടുംബങ്ങൾക്ക് ആശ്വാസവാർത്ത. തെരുവിലായ 15 കുടുംബങ്ങളെ ആറുമാസത്തിനുള്ളിൽ പുനരധിവസിപ്പിക്കുമെന്ന് പഞ്ചായത്ത് അധികൃതർ ഉറപ്പുനൽകി. ലൈഫ് ഭവന പദ്ധതിയിൽ പ്രത്യേക മുൻഗണന നൽകിക്കൊണ്ട് എല്ലാ കുടുംബങ്ങൾക്കും വീട് ലഭ്യമാക്കാനാണ് തീരുമാനം.
നിലവിൽ കമ്മ്യൂണിറ്റി ഹാളുകളിൽ കഴിയുന്ന കുടുംബങ്ങളെ താൽക്കാലികമായി സുരക്ഷിതമായ ലയങ്ങളിലേക്ക് മാറ്റാൻ നടപടികൾ സ്വീകരിച്ചുവരികയാണെന്ന് പഞ്ചായത്ത് പ്രസിഡന്റ് അറിയിച്ചു. നേരത്തെ, പുനരധിവാസം ആവശ്യമുള്ള 12 കുടുംബങ്ങൾക്ക് അവസരം ഒരുക്കുമെന്ന് ജില്ലാ കളക്ടർ വ്യക്തമാക്കിയിരുന്നെങ്കിലും അത് നടപ്പിലായിരുന്നില്ല. ഈ സാഹചര്യത്തിലാണ് പഞ്ചായത്തിന്റെ പുതിയ ഇടപെടൽ.
പന്നിയാർ പുഴയോരത്തെ കയ്യേറ്റങ്ങൾ ഒഴിപ്പിക്കുന്നതിന്റെ ഭാഗമായി 29 കുടുംബങ്ങളുടെ വീടുകളടക്കം 88 കെട്ടിടങ്ങളാണ് റവന്യു വകുപ്പ് പൊളിച്ചുനീക്കുന്നത്. ഹൈക്കോടതിയുടെ കർശന നിർദ്ദേശപ്രകാരമാണ് നടപടികൾ പുരോഗമിക്കുന്നത്. നോട്ടീസ് നൽകിയിട്ടും ഒഴിഞ്ഞുപോകാത്തതിനാലാണ് നടപടി സ്വീകരിക്കേണ്ടി വന്നതെന്ന് അധികൃതർ വിശദീകരിക്കുന്നു. കുടിയൊഴിപ്പിക്കലിനെതിരെ പ്രദേശത്ത് ശക്തമായ പ്രതിഷേധം ഉയർന്നിരുന്നു.
Photo and News Source: Sathyam Online
