പശ്ചിമ ബംഗാളിന്റെ മുഖ്യമന്ത്രിയായി സുവേന്ദു അധികാരി ശനിയാഴ്ച സത്യപ്രതിജ്ഞ ചെയ്യുമ്പോൾ, ബിജെപി ദേശീയ നേതൃത്വം വലിയൊരു രാഷ്ട്രീയ ലക്ഷ്യമാണ് പൂർത്തീകരിക്കുന്നത്. ഒരു കാലത്ത് അപ്രാപ്യമെന്ന് കരുതിയിരുന്ന ബംഗാൾ മണ്ണിൽ അധികാരം പിടിച്ചെടുക്കാൻ കഴിഞ്ഞത് പാർട്ടിയുടെ ചരിത്രത്തിലെ സുപ്രധാന നാഴികക്കല്ലാണ്. കോൺഗ്രസ്, ഇടതുപക്ഷം, തൃണമൂൽ കോൺഗ്രസ് എന്നിവയുടെ ഉരുക്കുകോട്ടയായിരുന്ന ബംഗാളിനെ ബിജെപിയിലേക്ക് അടുപ്പിക്കാൻ സുവേന്ദു അധികാരിയുടെ രാഷ്ട്രീയ തന്ത്രങ്ങൾ നിർണ്ണായകമായി.
1970-ൽ ശിശിർ അധികാരിയുടെയും ഗായത്രി അധികാരിയുടെയും മകനായി ജനിച്ച സുവേന്ദു, പിതാവിന്റെ പാത പിന്തുടർന്നാണ് രാഷ്ട്രീയത്തിൽ സജീവമായത്. 1990-കളുടെ മധ്യത്തിൽ കോൺഗ്രസിലൂടെ തുടക്കം കുറിച്ച അദ്ദേഹം, പിന്നീട് തൃണമൂൽ കോൺഗ്രസിലൂടെ വളർന്നു. നന്ദിഗ്രാം സമരത്തിന്റെ ബുദ്ധികേന്ദ്രമായും മമത ബാനർജിയുടെ വിശ്വസ്തനായും പ്രവർത്തിച്ച അദ്ദേഹം, 2020-ലാണ് ബിജെപിയിൽ ചേരുന്നത്. മമത ബാനർജിയെ നന്ദിഗ്രാമിലും ഭവാനിപ്പുരിലും പരാജയപ്പെടുത്തിയത് അദ്ദേഹത്തിന്റെ രാഷ്ട്രീയ കരുത്ത് തെളിയിക്കുന്നതായിരുന്നു.
ബിജെപിയുടെ ബംഗാളിലെ വളർച്ച അതിവേഗമായിരുന്നു. 2014-ൽ ഒരു സീറ്റിൽ ഒതുങ്ങിയ പാർട്ടി, 2016-ൽ മൂന്നിലേക്കും 2021-ൽ 77 സീറ്റുകളിലേക്കും വളർന്നു. ഒടുവിൽ ഇപ്പോൾ സംസ്ഥാന ഭരണം പിടിച്ചെടുക്കാനും ബിജെപിക്ക് സാധിച്ചു. ഗംഗോത്രി മുതൽ ഗംഗാസാഗർ വരെയുള്ള മണ്ണ് ഇപ്പോൾ ബിജെപിയുടെ കൊടിക്കീഴിലാണെന്നും, വർഷങ്ങളായി നിലനിന്നിരുന്ന ഭയത്തിന്റെ രാഷ്ട്രീയം അവസാനിച്ചുവെന്നും കേന്ദ്ര ആഭ്യന്തരമന്ത്രി അമിത് ഷാ നിയമസഭാംഗങ്ങളുടെ യോഗത്തിൽ അഭിപ്രായപ്പെട്ടു.
Photo and News Source: Mathrubhumi
