തെരഞ്ഞെടുപ്പ് ഫലത്തിന് പിന്നാലെ ഉണ്ടായ തിരിച്ചടികൾ ചർച്ച ചെയ്യുന്നതിനായി കേരളാ കോൺഗ്രസ് എമ്മിന്റെ സ്റ്റിയറിംഗ് കമ്മിറ്റി യോഗം ഇന്ന് കോട്ടയത്ത് ചേരുന്നു. തെരഞ്ഞെടുപ്പ് അവലോകനമാണ് യോഗത്തിന്റെ പ്രധാന അജണ്ട. പാർട്ടിയുടെ ശക്തികേന്ദ്രങ്ങളിൽ നേരിട്ട പരാജയങ്ങൾ ഗൗരവമായി തന്നെ യോഗം പരിശോധിക്കും.
പ്രത്യേകിച്ച്, പാലാ നിയോജകമണ്ഡലത്തിൽ ചെയർമാൻ ജോസ് കെ മാണി നേരിട്ട തുടർച്ചയായ രണ്ടാം പരാജയം യോഗത്തിൽ വലിയ ചർച്ചയാകുമെന്നാണ് സൂചന. ഇതിന് മുന്നോടിയായി കഴിഞ്ഞ ദിവസം പാലായിൽ നിയോജകമണ്ഡലം സമ്പൂർണ്ണയോഗം ചേർന്ന് സ്ഥിതിഗതികൾ വിലയിരുത്തിയിരുന്നു.
പാർട്ടിക്ക് സ്വാധീനമുള്ള മണ്ഡലങ്ങളിൽ റോഷി അഗസ്റ്റിൻ ഉൾപ്പെടെയുള്ള സിറ്റിങ് എംഎൽഎമാർക്ക് സംഭവിച്ച പരാജയങ്ങളും യോഗത്തിൽ പ്രതിനിധികൾ ഉന്നയിക്കും. വോട്ടർമാരുടെ വികാരം മനസ്സിലാക്കുന്നതിലും സംഘടനാപരമായ വീഴ്ചകൾ പരിഹരിക്കുന്നതിലും ഉണ്ടായ പോരായ്മകൾ യോഗം വിശദമായി പരിശോധിക്കും.
സ്റ്റിയറിംഗ് കമ്മിറ്റി യോഗത്തിന് ശേഷം എൽഡിഎഫുമായി ചേർന്ന് ഭാവി പരിപാടികൾ സംബന്ധിച്ചും പാർട്ടിയുടെ നിലപാടുകൾ സംബന്ധിച്ചും വ്യക്തത വരുത്താനാണ് നേതൃത്വത്തിന്റെ തീരുമാനം. മുന്നണിയിലെ ഘടകകക്ഷി എന്ന നിലയിൽ പാർട്ടിയുടെ നിലനിൽപ്പും വരുംകാല പ്രവർത്തനങ്ങളും യോഗത്തിൽ നിർണ്ണായകമാകും.
Photo and News Source: Kairali News
