ഇന്ത്യൻ വാഹന വിപണിയിൽ തങ്ങളുടെ ആധിപത്യം ഉറപ്പിക്കുന്നതിന്റെ ഭാഗമായി ഹ്യുണ്ടായ് ക്രെറ്റയുടെ വകഭേദങ്ങളിൽ നിർണ്ണായക മാറ്റങ്ങൾ വരുത്തി. ക്രെറ്റയുടെ ഏറ്റവും ജനപ്രിയ വകഭേദങ്ങളായിരുന്ന എസ് എക്സ് ടെക് (SX Tech), എസ് എക്സ് ഒ (SX(O)) എന്നിവ കമ്പനി ഔദ്യോഗികമായി നിർത്തലാക്കി. ഇതോടെ ക്രെറ്റയുടെ മോഡൽ നിരയിലും വില ഘടനയിലും വലിയ മാറ്റങ്ങളാണ് ഉണ്ടായിരിക്കുന്നത്.
നിലവിൽ ഇ, ഇ എക്സ്, ഇ എക്സ് ഒ, എസ് ഒ, എസ് എക്സ്, എസ് എക്സ് പ്രീമിയം, കിംഗ് എന്നിങ്ങനെ ഏഴ് ട്രിം ലെവലുകളിലായാണ് ക്രെറ്റ വിപണിയിൽ ലഭ്യമാകുന്നത്. ഈ മാറ്റം വരാനിരിക്കുന്ന പുതിയ ഫെയ്സ്ലിഫ്റ്റ് പതിപ്പിന്റെ മുന്നോടിയാണെന്ന അഭ്യൂഹങ്ങൾ വാഹന പ്രേമികൾക്കിടയിൽ ശക്തമാണ്. വിപണിയിലെ മത്സരം നേരിടാൻ തങ്ങളുടെ ഉൽപ്പന്ന നിരയെ കൂടുതൽ കാര്യക്ഷമമാക്കാനാണ് ഹ്യുണ്ടായ് ലക്ഷ്യമിടുന്നത്.
നേരത്തെ കുറഞ്ഞ ചിലവിൽ ലെവൽ 2 എ ഡി എ എസ് (ADAS) സുരക്ഷാ സംവിധാനം ലഭ്യമാക്കിയിരുന്ന വകഭേദമായിരുന്നു എസ് എക്സ് ടെക്. എന്നാൽ ഈ വേരിയന്റ് ഒഴിവാക്കിയതോടെ, എ ഡി എ എസ് സുരക്ഷാ സംവിധാനം ആവശ്യമുള്ള ഉപഭോക്താക്കൾ ഇനി ഏറ്റവും ഉയർന്ന പതിപ്പായ 'കിംഗ്' (King) ട്രിം തന്നെ തിരഞ്ഞെടുക്കേണ്ടി വരും. ഇത് ഇടത്തരം ഉപഭോക്താക്കൾക്ക് വലിയ സാമ്പത്തിക ബാധ്യത വരുത്തുമെന്നാണ് വിലയിരുത്തപ്പെടുന്നത്.
പുതിയ മാറ്റങ്ങളോടെ ക്രെറ്റയുടെ അടിസ്ഥാന മോഡലായ 'ഇ' പെട്രോൾ മാനുവലിന് 10.79 ലക്ഷം രൂപ മുതലാണ് വില ആരംഭിക്കുന്നത്. ടോപ്പ് എൻഡ് മോഡലായ കിംഗ് ടർബോ പെട്രോൾ ഡി സി ടി പതിപ്പിന് 19.90 ലക്ഷം രൂപ വരെ വില ഉയരുന്നു. മുമ്പ് 15.69 ലക്ഷം രൂപയ്ക്ക് ലഭിച്ചിരുന്ന എ ഡി എ എസ് സൗകര്യം ഇനി സ്വന്തമാക്കണമെങ്കിൽ കുറഞ്ഞത് 17.27 ലക്ഷം രൂപയെങ്കിലും ചെലവാക്കേണ്ടി വരും.
Photo and News Source: Siraj Live
