ബോളിവുഡ് താരങ്ങൾ മുംബൈയിലെ റിയൽ എസ്റ്റേറ്റ് വിപണിയിൽ സജീവമായി തുടരുകയാണ്. ഇതിന്റെ ഭാഗമായി സൽമാൻ ഖാന്റെ സഹോദരനും നടനുമായ അർബാസ് ഖാൻ തന്റെ ഉടമസ്ഥതയിലുള്ള അപ്പാർട്ട്മെന്റ് വിറ്റഴിച്ചു. മുംബൈ അന്ധേരി വെസ്റ്റിലെ ലോക്കണ്ട് വാല കോംപ്ലക്സിൽ സ്ഥിതി ചെയ്യുന്ന അപ്പാർട്ട്മെന്റാണ് 6.5 കോടി രൂപയ്ക്ക് കൈമാറ്റം ചെയ്തത്.
റിയൽ എസ്റ്റേറ്റ് നിരീക്ഷക സ്ഥാപനമായ സി.ആർ.ഇ മെട്രിക് പുറത്തുവിട്ട രേഖകൾ പ്രകാരം, മേയ് അഞ്ചിനാണ് ഈ ഇടപാട് പൂർത്തിയായത്. ഇൻഫിനിറ്റി മാളിന് സമീപമുള്ള റൺവാൾ എലഗന്റ് പ്രോജക്റ്റിലെ ടവർ ബിയിലാണ് ഈ അപ്പാർട്ട്മെന്റ് സ്ഥിതി ചെയ്യുന്നത്. രണ്ട് കാറുകൾ പാർക്ക് ചെയ്യാനുള്ള സൗകര്യവും ഈ ഫ്ലാറ്റിനോടൊപ്പമുണ്ട്. ഈ ഇടപാടിനായി സ്റ്റാമ്പ് ഡ്യൂട്ടി ഇനത്തിൽ 39 ലക്ഷം രൂപ അടച്ചിട്ടുണ്ട്. എന്നാൽ, അപ്പാർട്ട്മെന്റ് വാങ്ങിയ വ്യക്തിയെക്കുറിച്ചുള്ള വിവരങ്ങൾ ഇതുവരെ പുറത്തുവിട്ടിട്ടില്ല.
അന്ധേരി വെസ്റ്റ് മുംബൈയിലെ പ്രധാനപ്പെട്ടതും താരങ്ങൾ ഏറെ തിങ്ങിപ്പാർക്കുന്നതുമായ ഒരു റെസിഡൻഷ്യൽ മേഖലയാണ്. നേരത്തെ, അർബാസ് ഖാൻ മുംബൈയിലെ ജോഗേശ്വരിയിൽ 2.78 കോടി രൂപ മുടക്കി മറ്റൊരു അപ്പാർട്ട്മെന്റ് വാങ്ങിയിരുന്നു. ലിങ്ക് റോഡിലെ ഓട്ടോഗ്രാഫ് റെസിഡൻസിയിൽ 27-ാം നിലയിലുള്ള ഈ ഫ്ലാറ്റിനായി 16 ലക്ഷം രൂപ സ്റ്റാമ്പ് ഡ്യൂട്ടിയും 30,000 രൂപ രജിസ്ട്രേഷൻ ഫീസും അദ്ദേഹം അടച്ചിരുന്നു.
ബോളിവുഡ് താരം മലൈക അറോറയുടെ മുൻ ഭർത്താവ് കൂടിയാണ് അർബാസ് ഖാൻ. അടുത്തിടെ സൽമാൻ ഖാന്റെ സഹോദരി അൽവിരയുടെ ഭർത്താവും നടനുമായ അതുൽ അഗ്നിഹോത്രിയും മുംബൈയിൽ റിയൽ എസ്റ്റേറ്റ് നിക്ഷേപം നടത്തിയിരുന്നു. ബോളിവുഡ് താരങ്ങൾക്കിടയിൽ മുംബൈയിലെ പ്രോപ്പർട്ടികളിലുള്ള താൽപ്പര്യം വർദ്ധിച്ചുവരികയാണെന്ന് ഈ ഇടപാടുകൾ വ്യക്തമാക്കുന്നു.
Photo and News Source: Kairali News
